2018թ.-ի պետական բյուջեի նախագիծը քաղաքական փաստաթուղթ է, որն արտացոլում է, թե ինչու եւ ինչի համար են տրված առաջնահերթությունները: Այս մասին այսօր՝ նոյեմբերի 16-ին, խորհրդարանում հաջորդ տարվա բյուջեի նախագծի քննարկման ժամանակ ասաց ՀՀ փոխվարչապետ Վաչե Գաբրիելյանը:
«Կա՞ն խնդիրներ, իհարկե կան, կրթության տոկոսը մեզ բավարարո՞ւմ է, բնականաբար, ոչ, սակայն կային հերթականություններ: Եթե մենք հիմա սկսենք ուղղակի ծախսերի ավելացումը, ապա երբեք չէինք կարողանա այն տեմպին գալ, որի հետեւանքով մենք կարողանալու ենք մոտ ապագայում ավելացնել այդ ծախսերը: Սրանք իրողություններ են եւ հաշվարկներ»,- ասաց նա:
Վաչե Գաբրիելյանն անդրադարձավ նաեւ պետական պարտքի վերաբերյալ ընդդիմության հնչեցրած մտահոգություններին եւ քննադատություններին: Նա նշեց, որ այդ գործընթացը կառավարելի է եւ արդեն 2018թ.-ին շրջադարձային կետ է երեւում. ՀՆԱ-ի մեջ պետական պարտքը կայունանում է եւ մեկ տոկոսով իջնում է:
«Սա նշանակում է, որ մենք չենք շարունակելո՞ւ մեր զարգացման ծրագրերը, իհարկե ոչ, սակայն, մենք դա անելու ենք չափավորված ձեւով՝ համակցելով ընդհանուր կայունության հետ: Դա նշանակում է՝ մենք մեր ներքին ծրագրերն ավելացրել ենք, որ հենց ներքին ներդրումների վրա ուղղորդենք եւ ստեղծենք այդ հնարավորություններ, որոնք ոչ միայն տնտեսական աճ են ապահովում, այլեւ մեր քաղաքացիների համար կենսապայմաններ: Օրինակ, գյուղացիական համայնքներում կենսունակության ճանապարհներ ենք կառուցում, ինչը կենցաղի բարելավում է նշանակում»,- ասաց նա:
