Հայաստանի նախագահի եւ ԱԳ նախարարի այցերը Մոսկվա վաղուց էին ծրագրված, նույնը վերաբերում է նաեւ Ռուսաստանում Հայաստանի մշակութային օրերի անցկացմանն ու Սերգեյ Լավրովի՝ Հայաստան այցին: Կառավարության այսօրվա նիստից հետո լրագրողների հետ ճեպազրույցում այս մասին հայտարարեց ՀՀ ԱԳ փոխնախարար Շավարշ Քոչարյանը:
Նրա խոսքով՝ Ռուսաստանի ԱԳ նախարար Սերգեյ Լավրովի հայաստանյան այցը կապված է երկու երկրների դիվանագիտական հարաբերությունների հաստատման 25-ամյակի հետ:
«Մյուս կողմից՝ ակնհայտ է, որ որոշակի ակտիվություն կա ԵԱՀԿ Մինսկի խմբի համանախագահողների կողմից՝ կապված ղարաբաղյան հակամարտության կարգավորման հետ: Բնական է, որ տարբեր հանդիպումների ժամանակ նույն ԱԳ նախարարներն ազատ են քննարկել ցանկացած հարց, առավել եւս՝ այն հարցերը, որոնք այդքան կարեւոր են»,- հավելեց Շավարշ Քոչարյանը:
Ըստ պաշտոնյայի՝ համանախագահողներն ակնկալում են, որպեսզի կողմերի միջեւ վստահություն լինի՝ կարգավորման գործընթացում առաջընթացի հասնելու համար, իսկ դա ենթադրում է Վիեննայի եւ Սանկտ Պետերբուրգի պայմանավորվածությունների իրականացում: Իսկ բանակցություններում առաջընթաց ոչ միայն չկա, այլ, Քոչարյանի խոսքով, իրավիճակն ինչ-որ առումով պայթյունավտանգ է, ինչի ապացույցն են ապրիլյան դեպքերը: «Համանախագահները չեն կարող մտահոգված չլինել: Առավել եւս, որ Մինսկի խմբի համանախագահող երկրները նաեւ ՄԱԿ-ի անվտանգության խորհրդի մշտական անդամներ են, եւ նրանց համար անընդունելի է ռազմական գործողությունների վերսկսումը»,- հավելեց պաշտոնյան:
Հարցին, թե Սերգեյ Լավրովն իր հետ որեւէ առաջարկություն բերելո՞ւ է Երեւան, Շավարշ Քոչարյանը պատասխանեց, որ այդ մասին անընդհատ խոսվում է, բայց Ռուսաստանի ԱԳ նախարարը գործում է եռանախագահության ձեւաչափով: «Այդ տեսանկյունից մի քիչ տարօրինակ է, երբ փորձում են նրան առանձնացնել: Առավել եւս, որ ինքը մի քանի անգամ հրապարակային հերքել է: Առանձին ռուսական առաջարկներ չկան»,- հավաստեց Քոչարյանը:
Ինչ վերաբերում է Հայաստանի եւ Ադրբեջանի ԱԳ նախարարների հանդիպմանը. ԵԱՀԿ ՄԽ համանախագահներն առանձին-առանձին հանդիպում են նախարարների հետ, եւ չի բացառվում, որ միջնորդները նաեւ նրանց հանդիպում առաջարկեն: Երբ հստակ պայմանավորվածություն լինի, Շավարշ Քոչարյանի խոսքով, այդ մասին կհայտարարվի: