«Նուբարաշեն» ՔԿՀ-ում պահվող կալանավորված անձ Գեւորգ Սաֆարյանն ասել է, որ քերծվածքներն ստացել է ուշագնաց լինելու հետեւանքով: Այս մասին հաղորդագրություն է տարածել ՀՀ ԱՆ ՔԿՎ հանրային կապերի բաժինը՝ անդրադառնալով ՀՔԱ Վանաձորի գրասենյակի տարածած հայտարարությանը, ըստ որի, Գեւորգ Սարֆարյանին Նոյեմբերի 15-ի երեկոյան ահազանգ է ստացվել այն մասին, որ իր քաղաքակական հայացքների համար դատապարտված, «Նոր Հայաստան» քաղաքական միավորման անդամ Գեւորգ Սաֆարյանը Նուբարաշեն ՔԿՀ-ի իր խցակիցների կողմից ծեծի է ենթարկվել:
ՔԿՎ-ի տարածած հաղորդագրության մեջ ասվում է
«Այսօր Հելսինկյան քաղաքացիական ասամբլեայի Վանաձորի գրասենյակը հայտարարություն է տարածել այն մասին, թե երեկ՝ երեկոյան, ահազանգ է ստացել, որ ‹‹Նուբարաշեն›› քրեակատարողական հիմնարկի կալանավորված անձ Գեւորգ Սաֆարյանը իր խցակիցների կողմից ծեծի է ենթարկվել:
Հրապարակման կապակցությամբ հայտնում ենք, որ Գ. Սաֆարյանը հիմնարկի աշխատակիցներին բանավոր հայտարարել է, որ իր մարմնի վրա հայտնաբերված կարմիր հետքերը ու քերծվածքները ստացել է խցում ուշագնաց լինելու եւ վայր ընկնելու հետեւանքով:
Այնուամենայնիվ, տեղի ունեցածի փաստական հանգամանքները ամբողջապես պարզելու նպատակով «Նուբարաշեն» ՔԿՀ-ում նախապատրաստվում են նյութեր»: