2018թ. պետական բյուջեում արտացոլված քաղաքականությունը կապահովի Հայաստանի հետագա տնտեսական զարգացումների մեկնարկը, հիմքեր կստեղծի միջինում հինգ տոկոս տնտեսական աճի համար: Այս մասին այսօր՝ նոյեմբերի 16-ին, Ազգային Ժողովում 2018թ. պետական բյուջեի նախագծի քննարկմանն ասաց ԱԺ ՀՀԿ խմբակցության ղեկավար Վահրամ Բաղդասարյանը:
«Բյուջեի ծախսային քաղաքականության առանցքում դրված է տնտեսական աճը, երկրի անվտանգության բարձրացումը, սոցիալական նպատակայնությունը: Բյուջեն միտված է ստվերային տնտեսության կրճատմանը, կործանարար միջավայրում անհարկի խեղումների բացառմանը, հարկեր-ՀՆԱ ցուցանիշի կայուն բարելավմանը»,-ասաց նա:
Վահրամ Բաղդասարյանը նաեւ նշեց, որ Ազգային ժողովը պետք է վերահսկի, որպեսզի ՊԵԿ-ը կատարի իր պարտականությունները. «Մենք որպես խորհրդարանական վերահսկողություն պետք է հետեւողական լինենք եւ պետք է պարտադրենք, որպեսզի ՊԵԿ-ն իր պարտականությունները կատարի: Մեր նպատակը պետք է լինի, որպեսզի արհեստական մոնոպոլ կառույցները արմատախիլ արվեն, երբ քննադատություններ ենք հնչեցնում, պետք է մեզ հաշիվ տանք՝ ինչ ենք արել մեր երկրի համար եւ ինչ իրավունք ունենք ասելու: Քաղաքական փոքրամասնությունը ցանկություն է հայտնում ղեկավարելու քաղաքական մեծամասնությանը, այդպես չի կարող լինել, դրա ժամանակը կգա՝ 2022թ. Ազգային ժողովի ընտրություններ կլինեն, կապահովեք այդ մեծամասնությունը եւ այդ արտոնությունը կունենաք»:
Նշենք, որ Ազգային ժողովում այսօր շարունակում է վեցերորդ գումարման երկրորդ նստաշրջանը. օրակարգում 2018 թվականի պետական բյուջեի նախագիծն է:
2018 թվականի բյուջեի քննարկումները մեկնարկել են նախօրեին: