Տեսականորեն, եթե մեկ համանախագահ պակաս լինի, ապա ԵԱՀԿ Մինսկի խմբի ձեւաչափը կփոխվի: Այս մասին ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով ԵԱՀԿ Մինսկի խմբի նախկին համանախագահ Մեթյու Բրայզայի հայտարարությունը, որ ԱՄՆ-ն, հնարավոր է, հետ կանչի իր համանախագահին Պետքարտուղարության ֆինանսավորման կրճատման պատճառով, եւ Մինսկի խմբի ձեւաչափը կարող է փոխվել:
Զախարովայի խոսքով՝ ինքը հարցը դիտարկում է ոչ թե գործնական, այլ տեսական տեսանկյունից. «Այս հարցն ամերիկյան կողմին է ուղղված: Ամեն ինչ տրամաբանական է, եթե մեկ համանախագահ պակաս լինի, ապա ձեւաչափը կփոխվի: Այնտեղ կլինի մեկ համանախագահ հանած: Արդյոք այդպե՞ս կլինի, ի՞նչ պատճառով… նրանց փո՞ղը չի բավականացնում… Սա, իհարկե, ամերիկյան տնտեսության մեջ նոր խոսք է: Բայց եթե փողը չի բավականացնում, այս հարցն ամերիկյան կողմին է ուղղված, ոչ մեզ: Ռուսաստանի համար Լեռնային Ղարաբաղի հակամարտության կարգավորման թեման միջազգային օրակարգում առաջնահերթություններից մեկն է, որովհետեւ խոսքը ոչ միայն պարզապես մեր հարեւանների մասին է, մեզ համար խոսքը ժողովուրդների մասին է, որոնց հետ մեզ կապում է ոչ թե ուղղակի միջազգային-իրավական փաստաթղթերի եւ պարտավորություների պաշտոնական կողմը: Մեզ կապում է կյանքը, ճակատագիրը: Մենք տասնամյակներ, հարյուրամյակներ շարունակ ընդհանուր կյանք, ճակատագիր ենք ունեցել: Այս պատճառով Լեռնային Ղարաբաղի հակամարտության կարգավորման թեման մեզ համար առաջնային է: Իսկ ամերիկյան դիվանագիտությկան պտույտները պետք է Պետքարտուղարությունում մեկնաբանեն»:
