Կառավարությունից 1-2 օր խնդրելուց առաջ շատ լուրջ մտածեք: Այս մասին, այսօր՝ նոյեմբերի 16-ին, կառավարության նիստում հայտարարեց ՀՀ վարչապետ Կարեն Կարապետյանը՝ դիմելով Ֆինանսների փոխնախարար, գլխավոր գանձապետ Ատոմ Ջանջուղազյանին:
Վերջին ներկայացնում էր ԱԺ պատգամավորների օրենսդրական նախաձեռնությունների վերաբերյալ կառավարության առաջարկությունների նախագիծը: Խոսքը վերաբերում է Հաշվեքննիչ պալատի մասին եւ կից օրենքների փաթեթի վերաբերյալ կառավարության 12 առաջարկներին:
«Եթե համաձայն եք, պարոն վարչապետ, քանի որ քննարկումները շարունակվել են նաեւ կառավարության աշխատակազմ ներկայացնելու հետո, որոշակի խնդիրներ են առաաջացել խմբագրության իմաստով, եւ տեքստը բարելավելու հնարավորություն կա»,-ասաց Ջանջուղազյանը:
«Պարոն Ջանջուղազյան, որքա՞ն ժամանակ է, որ սա քննարկվում է: Շատ երկար: Միշտ 1-2 օր չի հերիքո՞ւմ: Եկեք՝ չէ: Դե չի կարելի, մի օր պետք է այս ամեն ինչը դադարեցնենք: Հաջորդ անգամ 1-2 օր խնդրելուց առաջ շատ լուրջ մտածեք, մանավանդ որ ժամանակ եղել է: Ամիսներով քննարկում եք, գալիս եք կառավարության նիստին ու միշտ 1-2 օր մեզ պակասում է»,-վրդովվեց վարչապետը:
