Հայաստանի կառավարությունն այսօր՝ նոյեմբերի 16-ին, հավանության է արժանացրել նաեւ Հեռուստատեսության եւ ռադիոյի մասին եւ հարակից այլ օրենքներում լրացումներ կատարելու մասին ՀՀ սահմանադրական օրենքի նախագծերի փաթեթի վերաբերյալ կառավարության օրենսդրական նախաձեռնությունը:
Հարցը ներկայացնող Արդարադատության նախարար Դավիթ Հարությունյանը նշեց, որ նախագծով մանրամասն սահմանվում է Հեռուստատեսության եւ ռադիոյի հանձնաժողովի կարգավիճակը, հանձնաժողովի անդամների կազմը, ընտրության կարգը, նրանց ներկայացնող պահանջները:
«Առանձին բլոկ է նվիրված մոնիթորինգին, որպեսզի հանձնաժողովը կարողանա ապահովել կրթական, մշակութային եւ ժամանցային բնույթի հաղորդումների բազմազանությունը: Սահմանվել է նաեւ, որ Հեռուստատեսության եւ ռադիոյի հանձնաժողովի կարգավիճակը: Ըստ այդմ՝ հանձնաժողովը ղեկավար մարմին է, որի անդամներին նշանակում է վարչապետը՝ մրցութային կարգով: Սահմանվել է նաեւ, թե ինչ ձեւով պետք է հեռարձակվեն բռնություն, սարսափ պարունակող, էրոտիկ բնույթի հաղորդումները՝ նախատեսելով, որ չափանիշները պետք է սահմանի լիազոր մարմինը»,-ընդգծեց Դավիթ Հարությունյանը:
