Ազգային ժողովում այսօր շարունակվել են 2018 թվականի պետբյուջեի նախագծի քննարկումները: Նախորդ նիստերի ոգով՝ ընդդիմադիրները քննադատել են նախագիծը՝ այն հակասոցիալական որակելով, իսկ իշխող կոալիցիոն՝ պաշտպանել: Քննարկումներն այսօր ավարտվել են, հիմա խմբակցությունները 24 ժամ ունեն՝ նախագծի շուրջ վերջնական առաջարկություններ ներկայացնելու համար: Ենթադրվում է, որ բյուջե-2018-ին խորհրդարանը կանդրադառնա հաջորդ շաբաթ, արտահերթ նիստով:
Նախագիծը խորհրդարանում ներկայացնող ֆինանսների նախարարը ճեպազրույց է ունեցել լրագրողների հետ: Վարդան Արամյանը նշել է, որ տնտեսական աճ ապահովելու մասին իշխանության եւ ընդդիմության պատկերացումները տարբեր են: Վստահեցնում է, որ թեեւ չեն կարողանում բարձրացնել թոշակներն ու աշխատավարձերը, բայց քայլեր են ձեռնարկում՝ բնակչությանն աշխատելու հնարավորություն տալու համար: Ասում է՝ պետք է օժանդակել մարդկանց, որպեսզի սեփական ուժերով բարելավեն իրենց սոցիալական վիճակը:
Մեր թղթակցի հետ զրույցում էլ ՀՀԿ-ական Վահրամ Բաղդասարյանն անդրադարձել է Վանաձորի ավագանու հարցով Սահմանադրական դատարանի կայացրած որոշմանը: Հիշեցնենք, որ դատարանի որոշմամբ ՏԻՄ օրենսգրքի դրույթները հակասահմանադրական են ճանաչվել, որի հիման վրա քաղաքապետը նիստեր էր գումարում, չնայած ավագանիում ընդդիմության ներկայացուցիչները նիստին չէին ներկայանում եւ քվորում չէր ապահովվում: Արդյո՞ք ՍԴ-ի որոշումից հետո Վանաձորի ավագանին լուծարելու որոշում կկայացվի:
Կառավարությունն այսօրվա նիստում հավանություն է տվել Հայաստանին ռուսական պաշտպանական 100 մլն դոլար վարկի տրամադրման համաձայնագրին եւ այն ուղարկել խորհրդարանի վավերացմանը: Վարկը տրամադրվելու է ռուսական արտադրության ռազմական նշանակության արտադրանքի մատակարարումը ֆինանսավորելու համար:
Իսկ վարչապետ Կարեն Կարապետյանը դժգոհել է անչափահասներին ծխախոտի, ալկոհոլի վաճառքը, գիշերային ակումբներ եւ զվարճանքի այլ վայրեր այցելությունը կանխելուն ուղղված քայլերից: Այդ ուղղությամբ աշխատանքը վարչապետին չի բավարարում. հանձնարարել է խստացնել պատասխանատվությունը: Վարչապետը նաեւ դժգոհ է, որ գերատեսչությունները բազմաթիվ հարցեր երկար ժամանակ քննարկում են, հետո կառավարության նիստի գալիս ու էլի մի քանի օր խնդրում: Այսօր լրացուցիչ ժամանակ էր խնդրում ֆինանսների փոխնախարար Ատոմ Ջանջուղազյանը. ուզում են լավացնել Հաշվեքննիչ պալատին վերաբերող պատգամավորների նախաձեռնության շուրջ կառավարության առաջարկների տեքստը: Կարեն Կարապետյանը նախ մերժեց, հետո զիջեց, բայց եւ խստորեն զգուշացրեց:
Հայաստանի նախագահի եւ արտգործնախարարի՝ Մոսկվա կատարած այցը վաղուց էր ծրագրված: Կառավարության նիստից հետո լրագրողների հետ զրույցում հավաստել է Շավարշ Քոչարյանը՝ հավելելով, որ նույնը վերաբերում է նաեւ Սերգեյ Լավրովի երեւանյան այցին: Նա հերքել է պնդումները, թե Լավրովը ղարաբաղյան հիմնախնդրի հարցով առանձին՝ ռուսական առաջարկներ է ներկայացնելու Բաքվում եւ Երեւանում: Ինչ վերաբերում է Մինսկի խմբի համանախագահների ակտիվությանը. Քոչարյանի պնդմամբ՝ բանակցություններում վաղուց առաջընթաց չկա, վիճակը նույնիսկ պայթյունավտանգ է, ինչը սա չի կարող չանհանգստացնել եռանախագահներին:
Հավելենք, որ Մինսկի խմբի համանախագահները նոյեմբերի 14-ին Մոսկվայում հանդիպել էին Էդվարդ Նալբանդյանի հետ, նոյեմբերի 16-ին՝ Էլմար Մամեդյարովի: Հանդիպումների արդյունքներով եռանախագահներն այսօր հայտարարություն են տարածել եւ հայտնել, որ դեկտեմբերի Վիեննայում կայանալիք ԵԱՀԿ Նախարարական խորհրդի շրջանակում համատեղ հանդիպում են անցկացնելու: Քննարկելու են շփման գծում լարվածությունը թուլացնելուն ուղղված կոնկրետ միջոցառումներ:
Նոյեմբերի 15-ի երեկոյան ահազանգ է ստացվել, որ «Նոր Հայաստան» քաղաքական միավորման անդամ Գեւորգ Սաֆարյանը «Նուբարաշեն» ՔԿՀ-ի իր խցակիցների կողմից ծեծի է ենթարկվել: Այս մասին հաղորդագրությունն այսօր տարածել է Հելսինկյան քաղաքացիական ասամբլեայի Վանաձորի գրասենյակը: Ավելի ուշ Քննչական կոմիտեն հայտարարեց, որ Սաֆարյանը քերծվածքներ է ստացել ուշագնացության հետեւանքով: Այդ մասին, հաղորդագրության համաձայն, քրեակատարողական հիմնարկի աշխատակիցներին հենց Գեւորգ Սաֆարյանն է ասել:
Փաստաբան Տիգրան Հայրապետյանը, սակայն, հերյուրանք է որակում ուշագնացության մասին հայտարարությունները: Նա հավաստում է, որ դեպքից մեկ ժամ անց դիտորդական խումբ է գնացել «Նուբարաշեն», սակայն դիտորդներին թույլ չեն տվել հանդիպել Սաֆարյանին: Ավելին, փաստաբանի պնդմամբ, մի քանի խուց այն կողմ գտնվող Աշոտ Պետրոսյանը լսել է Սաֆարյանին ծեծելու ձայները: Ամեն դեպքում, տեղի ունեցածի հանգամանքները պարզելու համար նյութեր են նախապատրաստվում:
Ադրբեջանի տարածքում կեսգիշերին մոտ 5.3 մագնիտուդով երկրաշարժ է գրանցվել: Էպիկենտրոնում ստորգետնյա ցնցումների ուժգնությունը կազմել է 7 բալ: Երկրաշարժի էպիկենտրոնը գտնվել է Հայաստանի պետական սահմանից 79 կմ հեռավորությամբ: Հայաստանի գրեթե ամբողջ տարածքում այն զբաղվել է 2-3, Արցախում՝ 3-4 բալ ուժգնությամբ: Երկրաշարժի հետեւանքով Արցախում վնասներ կան. վնասվել է Տիգրանակերտի ամրոցի՝ 1970 թվականին կառուցված մասը: Պատմական շինությունները, բարեբախտաբար, չեն վնասվել:
Արմավիրի «Մանուշակ» մանկապարտեզում հոկտեմբերի 30-ին 3-ամյա երեխային պատանդ վերցնելու մեջ մեղադրվողն արդեն ցուցմունք է տվել: Արգամ Հովիկյանը պատմել է, որ գնացել է նախկին կնոջ հետ խոսելու. ցանկացել է նրան համոզել՝ նորից միանալ: Հովիկյանը պնդել է, որ կնոջ ծնողներն են իրենց ընտանիքի քայքայման պատճառը: Մեղադրյալի պաշտպանի խոսքով՝ Հովիկյանը որոշել էր, որ եթե կինը չհամաձայնի վերադառնալ, նրա աչքի առաջ ինքնասպանություն պետք է գործեր: Սակայն չի հասցրել. կինը կարողացել է փախչել, իսկ ոստիկանները շրջապատել են մանկապարտեզը, այդ պատճառով էլ տղամարդը պատանդառել է 3-ամյա տղային ու փակվել մանկապարտեզում: Հիշեցնենք, որ, որոշ տվյալներով, Հովիկյանը դեպքի օրն ալկոհոլի ազդեցության տակ է եղել: Այս վարկածը, սակայն, դեռ չի հաստատվել. փորձաքննության արդյունքները դեռ չեն ստացվել:
Դոլարն ու եվրոն սկսեցին էժանանալ: Նոյեմբերի 16-ին դոլարի փոխարժեքը կազմել է 487 դրամ, եվրոյինը՝ 573, ռուբլունը՝ 8 դրամ 14 լումա, ֆունտինը՝ 642 դրամ:
Նոյեմբերի 17-18-ը հանրապետությունում սպասվում է առանց տեղումների եղանակ: Օդի ջերմաստիճանն 20-ի գիշերը 4-5 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +3+5, ցերեկը՝ +14+16 աստիճան տաքություն: