Հայաստանի ԱԳ նախարար Էդվարդ Նալբանդյանը խուսափեց Բրյուսելում Արեւելյան գործընկերության առաջիկա գագաթնաժողովի հռչակագրի բովանդակության մեկնաբանությունից:
Նոյեմբերի 17-ին կայացած մամուլի ասուլիսի ժամանակ հարցին՝ կողմերի մոտեցումների տարբերության մասին եւ ինչպես դա կանդրադառնա հակամարտությունների վերաբերյալ դրույթի վրա, նախարարը նշեց, որ կողմերի մոտեցումների տարբերությունները համընդհանուր հայտնի են: Նրա խոսքով՝ ավելի շուտ խոսքը Ադրբեջանի եւ եվրոպական կառույցների մոտեցումների տարբերության մասին է:
«Կարգավորման հարցում ԵՄ դիրքորոշումը մշտապես արտահայտվել է համանախագահ երկրների ջանքերին աջակցությամբ: Սա մտածված եւ կշռադատված դիրքորոշում է, որպեսզի կարգավորման գործընթացին չվնասեն, աջակցություն միջնորդների բացառապես խաղաղ կարգավորման համար ջանքերին եւ մոտեցումներին: ԵՄ դիրքորոշումը չի փոխվել»,- նշեց ԱԳ նախարարը: Ինչ վերաբերում է հռչակագրի տեքստին, ապա բանակցությունները շարունակվում են, եւ քանի դեռ դրանք չեն ավարտվել, վաղ է հայտարարություններ կատարել, ընդգծեց նա: