Ժիրայր Սեֆիլյանի եւ մյուսների գործով դատական նիստին այսօր՝ նոյեմբերի 17-ին, մեղադրող կողմը հրաժարվեց ապացույց ճանաչված թվով 36 տեսանյութից:
Երեւանի Շենգավիթ վարչական շրջանի ընդհանուր իրավասության դատարանում մեղադրողներից Պետրոս Պետրոսյանը միջնորդեց հրապարակել տեսանյութերից միայն երկուսը, որոնցից մեկում Սեֆիլյանը խոսում է 2015թ. ապրիլի 24-ին նախատեսվող միջոցառումների մասին, իսկ երկրորդում Գեւորգ Սաֆարյանն է ելույթ ունենում Ազատության հրապարակում հանրահավաքի ժամանակ: Նշենք, որ նախաքննության ընթացքում ապացույց համարված 42 տեսանյութից փաստացի որպես ապացույց մեղադրողը թողեց 6-ը: Հիշեցնենք, որ 4 տեսանյութ էլ հրապարակվել էր նախորդ նիստում:
Այսօր հրապարակված տեսանյութում Ժիրայր Սեֆիլյանը մասնավորապես հայտարարում է. «Հավաքվելու ենք ապրիլի 24-ին եւ այդ օրը մեր գործն անելու ենք, հայ ժողովուրդը վերջապես իր մեջ ուժ պետք է գտնի ձերբազատվելու այս օկուպացիոն ռեժիմից: Մենք մինչեւ ամսի 24-ը ժողովուրդն այնպիսի ալիք պետք է բարձրացնի, որ այդ օրը ռեժիմն այլ տարբերակ չունենա եւ հեռանա: Բայց հանկարծ եթե բռնություն կիրառվեց, պատասխանն էլ կլինի բռնություն»,- ասուլիսի ժամանակ ասել էր Ժիրայր Սեֆիլյանը:
Սեֆիլյանը դատարանում հայտարարեց, որ ինքն այդ խոսքերից չի հրաժարվում, իր ելույթն այժմ էլ ակտուալ է: Հրապարակվեց նաեւ «Կամ արժանապատիվ ապագա, կամ կզոհվեմ Բաղրամյան 26-ի մատույցներում» վերտառությամբ տեսանյութը, որում Գեւորգ Սաֆարյանի ելույթն է հանրահավաքի ժամանակ: Ժիրայր Սեֆիլյանը հայտարարեց, որ այդ տեսանյութում հնչած յուրաքանչյուր մտքի հետ համակարծիք է: Նշենք, որ այս տեսանյութի հրապարակման ժամանակ Սաֆարյանը նիստերի դահլիճում չէր, նա հեռացված էր 4 ժամով:
Ժիրայր Սեֆիլյանի պաշտպան Տիգրան Հայրապետյանը տեսանյութերի հետազոտումից հետո հիշեցրեց, որ դրանք եղել են 2014թ.-ի ընթացքում հրապարակային եւ եթե իրավապահները դրա մեջ ինչ-որ վտանգավորություն էին տեսնում, դեռ այդ ժամանակ պետք է զբաղվեին:
«Եթե այս մարդկանց դեմ քրեական գործ է հարուցվել այս ելույթների համար, ապա իրավապահների դեմ նույնպես քրգործ պետք է հարուցվի անգործություն ցուցաբերելու կասկածանքով: Սեֆիլյանն իր այս ելույթում նշում է, որ ամեն ինչ անելու են, որ նույնիսկ քաոս չլինի, եւ սա դրել եք մեղադրանքի հիմքում: Սա տիպիկ ընդդիմադիր քաղաքական գործչի ելույթ է»,- ասաց Տիգրան Հայրապետյանը:
Ամբաստանյալներից Ներսես Պողոսյանի պաշտպան Արայիկ Պապիկյանը նույնպես միացավ գործընկերոջը՝ տեսանյութերի հրապարակումից շուրջ 3 տարի անց՝ այս գործը դատարան ուղարկելուց օրեր առաջ են սրանք ապացույց համարվել եւ կցվել գործին:
«Երկու տարի առգրավվել են տեսանյութերը, քննիչը դրել է բարձի տակ ու ոչինչ չի արել: Նախաքննության ավարտից առաջ արագ-արագ սրանք դրել են մեղադրանքի հիմքում եւ ուղարկել դատարան»,- ասաց Արայիկ Պապիկյանը:
Պաշտպանական կողմը մեղադրողներից հետաքրքրվեց՝ ինչ հիմքով են այս տեսանյութերը դրվել մեղադրանքի հիմքում, որտեղ է կոնկրետ ապացուցվում Սեֆիլյանի կամ Սաֆարյանի մեղքն այս տեսանյութերում: Մեղադրող Պետրոս Պետրոսյանը հորդորեց սպասել դատական վիճաբանությունների փուլին, իսկ պաշտպանների հայտարարություններն էլ որակեց «դեկլարատիվ»: Մյուս մեղադրող Հակոբ Ենոքյանն էլ խորհուրդ տվեց պաշտպանական կողմին զինվել համբերությամբ եւ սպասել ապացույցների հետազոտման ավարտին:
Նշենք, որ այս ընթացքում ավարտվեց Գեւորգ Սաֆարյանի՝ նիստերից հեռացվելու ժամկետը եւ նա բերվեց դահլիճ: Սաֆարյանին ներկաները դիմավորեցին ծափահարություններով: Րոպեներ անց Սաֆարյանը դատավոր Տաթեւիկ Գրիգորյանից հետաքրքրվեց, թե ինչու իր պաշտպան Տիգրան Եգորյանը չի հրավիրվել դատարան:
«Իմ պաշտպանության իրավունքն է ոտնահարվում»,- նստած դատարանին դիմեց Սաֆարյանը:
Դատավորը որոշեց նիստերի դահլիճից հեռացնել Սաֆարյանին: Նշենք, որ ամբաստանյալի համար դատարանը հանրային պաշտպան է ներգրավվել, որն այսօր նիստերի դահլիճում էր եւ որեւէ կերպ չարձագանքեց դատարանի այս որոշմանը:
Դատական նիստը շարունակվում է: