Կարիերայի եւ ձեռնարկատիրության տոնավաճառը նպատակ ունի ծառայել ոչ միայն աշխատանք փնտրողներին, այլ նաեւ նոր, ստեղծագործ գաղափարներ ունեցող երիտասարդների համար լավ հարթակ կարող է ծառայել իրենց գաղափարների իրականացման, նոր գիտելիքներ եւ հմտություններ ձեռք բերելու համար։ Այս մասին այսօր՝ նոյեմբերի 17-ին, տոնավաճառի բացման ժամանակ հայտարարեց ԱՄՆ դեսպան Ռիչարդ Միլզը։
Նրա փոխանցմամբ, Հայաստանում շատ աշխատատեղեր կան, եւ դրա ապացույցն է այն, որ այսօր միայն 33 ընկերություններ ներկայացրել են շուրջ 200 թափուր աշխատատեղեր։ «Իհարկե, երկրում առկա են տնտեսական խնդիրներ, կա արտագաղթի խնդիր, սակայն եթե Հայաստանը զարգացնի տնտեսական բաղադրիչը, աջակցի ձեռնարկատիրությանը, բարեփոխումներին, ժողովրդավարությանը, իրավիճակը կարող է փոխվել»,-հայտնեց նա։
Դեսպանի կարծիքով, Հայաստանում ստեղծված են լավ պայմաններ ձեռնարկատիրությամբ զբաղվելու համար։ «Որպես լավ օրինակ կարելի է բերել ՏՏ ոլորտում գործող մի շարք ձեռնարկությունների, որոնք ամուր կապեր ունեն Սիլիկոնյան հովտում գործող ընկերությունների հետ»,-շեշտեց նա։
Խոսելով աշխատանք փնտրողների մասին, դեսպանը կարծիք հայտնեց, որ լավ աշխատանքի առաջին գրավականը կրթություն ն է՝ «բայցեւ լավ կրթություն ստանալուց հետո շրջանավարտները կարող է միանգամից չստանան այն աշխատանքը, որը երազում են, պետք է անընդհատ աշխատել, նոր գիտելիքներ ու հմտություններ ձեռք բերել, արդյունքում լավ վարձատրվող աշխատանքը կգտնեն»։
Տոնավաճառի համակարգող, ԱՄՆ փոխանակման ծրագրի շրջանավարտ Հայկուհի Գեւորգյանն էլ իր հերթին ընդգծեց, որ տոնավաճառին ներկա գտնվելու հայտ են ներկայացրել շուրջ 70 ընկերություններ, որոնցից ընտրվել են առաջատար 33-ը։ «Բացի այդ, այստեղ կազմակերպվել են նաեւ դասընթացներ եւ թրեյնինգներ՝ ուսանողներին ու աշխատանք փնտրողներին հնարավորություններ տալով գործատուին ներկայանալու հմտություններ եւ ձեռնարկատիրական գիտելիքներ ձեռք բերելու»,-ավելացրեց նա։
