Թուրքիայի՝ ռուսական զենիթահրթիռային Ս-400 համակարգերի ձեռքբերման հայտարարված ծրագրերի իրականացումը կզրկի նրան ՆԱՏՕ-ի տեխնոլոգիաների հասանելիությունից եւ, հավանաբար, իր հետեւից կբերի Անկարայի նկատմամբ նաեւ այլ միջոցների ընդունում, որոնք կսահմանափակեն նրա՝ ամերիկյան հինգերորդ սերնդի F-35 բազմաֆունկցիոնալ կործանիչ-ռմբակոծիչների գնման եւ օգտագործման հնարավորությունները:Այդ մասին հաղորդում է ՏԱՍՍ-ը՝ հղում անելով ԱՄՆ ՌՕՈՒ նախարարի օգնականի տեղակալ Հեյդի Գրանտի հայտարարությանը:
Գրանտի խոսքով՝ եթե Մոսկվայի ու Անկարայի միջեւ Ս-400-ի շուրջ փաստացի պայմանավորվածության հասնելու մասին վերջին հաղորդագրությունները հաստատվեն, դա լուրջ ազդեցություն կունենա ՆԱՏՕ-ի հետ Թուրքիայի հետագա ռազմական համագործակցության վրա: Գրանտը նշել է, որ մինչ այս պահը ԱՄՆ-ըայդ գործարքը լուրջ քննության չէր ենթարկել հյուսիսատլանտյան դաշինքի ազդեցիկ անդամի տեսանկյունից:
«Մենք մտադիր ենք սկսել դիտարկումը, թե, եթե նրանք դա իրականացնեն, ինչպես կարող ենք մենք Թուրքիայի հետ ապահովել համագործակցությունն ապագայում, - հայտարարել է ԱՄՆ ՌՕՈՒ ներկայացուցիչը: - Բայց արդեն հիմա կարող եմ ասել, որ մեր ռազմավարությունը մեզ թույլ չի տալիս համագործակցել այդ համակարգի հետ»:
Գրանտն ընդգծել է, որ Թուրքիայի հիշյալ մտադրությունները էականորեն կդժվարացնեն 2018-ի համար ծրագրված F-35 ինքնաթիռների այդ երկիր տեղափոխումը:
«Դա լուրջ մտահոգություն է առաջացնում ոչ միայն ԱՄՆ-ի մոտ, քանի որ մենք պետք է ապահովենք բարձր տեխնոլոգիաների պահպանումը, այլ նաեւ մեր բոլոր գործընկերների եւ համախոհների մոտ, ովքեր արդեն ձեռք են բերել F-35»: