Նոյեմբերի 15-ից 16-ը Մոսկվայում կայացած Bee-Together թեթեւ արդյունաբերության գործարար հարթակում, ՀՀ տնտեսական զարգացման եւ ներդրումների նախարարության հետ համատեղ իրականացվող ՄԱԿ-ի արդյունաբերական զարգացման կազմակերպության (ՄԱԱԶԿ/UNIDO) «Հայաստանի արտահանման ուղղվածություն ունեցող ճյուղերի մրցունակության բարձրացում արդիականացման եւ շուկան մատչելի դարձնելու միջոցով» ծրագրի շրջանակներում, արդեն 4-րդ անգամ ներկայացվել են Հայաստանի հագուստ եւ կոշիկ արտադրող ընկերությունները:
ՀՀ տնտեսական զարգացման եւ ներդրումների նախարարությունից NEWS.am-ին հայտնում են, որ այս տարի Հայաստանից միջոցառմանը մասնակցել են 24 ընկերություններ։ Bee-together-ը գործարար հարթակ է, որտեղ արտադրողներին հնարավորություն է ընձեռվում հանդիպելու Ռուսաստանի հագուստի եւ կոշիկի առաջատար ապրանքանիշերի ներկայացուցիչների հետ եւ բանակցելու արտադրական ծառայությունների մատուցման շուրջ (аутсорсинг/outsourcing): Այս տարի Bee-Together գործարար հարթակին մասնակցել են 100-ից ավելի արտադրողներ շուրջ 10 երկրից:
ՄԱԱԶԿ ծրագրի շարունակականության շնորհիվ, հայաստանյան ընկերություններին հաջողվել է համագործակցություն հաստատել Ռուսաստանի հագուստի եւ կոշիկի խոշորագույն ապրանքանիշերը ներկայացնող կազմակերպությունների հետ եւ կնքել արտահանման պայմանագրեր:
Միջոցառման շրջանակում կայացել են շուրջ 30 հանդիպումներ: Ռուսաստանյան ընկերությունները մեծ հետաքրքրվածություն են ցուցաբերել՝ տեղադրելու իրենց արտադրական պատվերները Հայաստանի ձեռնարկություններում: Ձեռք են բերվել նախնական պայմանավորվածություններ, ակկնկալվում է նոր պայմանագրերի կնքում:
ՄԱԿ-ի արդյունաբերական զարգացման կազմակերպության «Հայաստանի արտահանման ուղղվածություն ունեցող ճյուղերի մրցունակության բարձրացում արդիականացման եւ շուկան մատչելի դարձնելու միջոցով» ծրագիրը բազմակողմանի փորձագիտական աջակցություն է տրամադրում արտադրողներին, այդ թվում՝ մարքեթինգային, իրավաբանական, ֆինանսական կառավարման, կադրերի ապահովման, նմուշների պատրաստման, հումքի ձեռքբերման, արտադրության կազմակերպման, արտադրանքի որակի վերահսկման եւ այլ հարցերում: