Ժիրայր Սեֆիլյանի եւ մյուսների գործով դատական նիստին այսօր՝ նոյեմբերի 17-ին, գործով ամբաստանյալ Ժիրայր Սեֆիլյանի շահերի պաշտպան Տիգրան Հայրապետյանը հայտարարեց, որ այս գործով անջատված մասով ամբաստանյալ Սմբատ Գալոյանը ԱԱԾ գործակալ է: Նրա խոսքով, հանցագործության պրովոկացիա է կատարել ԱԱԾ-ն եւ իր գործակալը հանդիսացող Սմբատ Գալոյանի միջոցով ստեղծել է ենթադրյալ խումբ եւ այդ ամեն ինչի արդյունքում Ժիրայր Սեֆիլյանն հայտնվել է ամբաստանյալի աթոռին: Տիգրան Հայրապետյանի խոսքով, մեղադրանքի հիմքում դրվել են Սմբատ Գալոյանի նկատմամբ ներքին դիտման եւ գաղտնալսման արդյունքները, սակայն, նրան ազատ են արձակել, իսկ նույն հանցանքի մեջ մեղադրվող մյուս անձինք՝ կալանավորվել:
«Կա հանցագործության պրովոկացիա, միջնորդում եմ, որ դատարանը պահանջի Սմբատ Գալոյանի մասին օպերատիվ տեղեկություններ՝ նա գործակալ է, թե ոչ, եւ ինչ դերակատարում ունի այս գործում»: Դատարանը այս միջնորդությունը համարեց ոչ ժամանակին արված եւ մերժեց:
Սմբատ Գալոյանին 2016 թվականի մայիսի 20-ից հետո առաջադրվել է նույն մեղադրանքը, ինչ այս խմբի մյուս անդամներին, սակայն նա ստորագրությամբ ազատ է արձակվել, նրա մասով գործն անջատված է, ընթանում է նախաքննություն:
Նշենք, որ այս գործով մեղադրվում են Ժիրայր Սեֆիլյանը, Գեւորգ Սաֆարյանը, Հրայր Թոփչյանը, Սասունիկ Կիրակոսյանը, Հովհաննես Պետրոսյանը, Գալուստ Գրիգորյանը, Ներսես Պողոսյանը:
Ժիրայր Սեֆիլյանը մեղադրվում է զանգվածային անկարգություններ կազմակերպելու եւ զենքի գործադրմամբ շենքեր, շինություններ զավթելու նախապատրաստության մեջ: Բացի Սեֆիլյանից, մեղադրանք է առաջադրվել նաեւ Գեւորգ Սաֆարյանին, Ներսես Պողոսյանին, Գալուստ Գրիգորյանին, Հրայր Թոփչյանին, Սասունիկ Կիրակոսյանին եւ Հովհաննես Պետրոսյանին:
Այս գործը քննվում է Երեւանի Աջափնյակ եւ Դավթաշեն վարչական շրջանների ընդհանուր իրավասության դատարանում, սակայն նիստերն անցկացվում են արտագնա` Շենգավիթ վարչական շրջանի ընդհանուր իրավասության դատարանում: