Վայոց ձորի մարզի Արփի գյուղում 700 հակ անասնակեր է այրվում, հրդեհը դեռ չի հաջողվում մեկուսացնել: Այս մասին NEWS.am-ի հետ զրույցում ասաց Արփիի համայնքապետ Ռազմիկ Վարդանյանը:
«Այս պահին դեռ 3 մարտական հաշվարկ փորձում է մարել հրդեհը, սակայն չի հաջողվում: Գյուղացիները բոլորը հավաքվել օգնում են, սակայն բոլոր 700 հակն էլ այրվել է, ահռելի վնաս է հասցվել գյուղացուն, լավ է գոնե անասուններին կարողացանք գոմից դուրս հանել»,-ասաց գյուղապետը` նշելով, որ խոտի հակերը պատկանում են Արփիի բնակիչ Հազարապետ Մանուկյանին:
Ռազմիկ Վարդանյանի խոսքով` գյուղապետարանը միջոցներ չունի, որպեսզի փոխհատուցում տրամադրի համագյուղացուն, սակայն փորձելու են դիմել մարզպետարան որպեսզի որեւէ փոխհատուցում ստանան:
Ավելի վաղ Արտակարգ իրավիճակների նախարարությունը հայտարարություն էր տարածել, որ նոյեմբերի 18-ին՝ ժամը 06:55-ին, ահազանգ է ստացվել, որ Վայոց ձորի մարզի Արփի գյուղում այրվում է կուտակած անասնակեր:
Դեպքի վայր են մեկնել երեք մարտական հաշվարկ, մարզային փրկարարական վարչության եւ մարզային ճգնաժամային կառավարման կենտրոնի օպերատիվ խմբերը:
Պարզվել է, որ Արփի գյուղի 26-րդ փողոցի թիվ 24 տան մոտակայքում այրվում է Հ. Մ.-ին պատկանող անասնագոմի տանիքում կուտակած անասնակեր (մոտ 700 հակ):
