Գիտությունը, ինչպես մարդկային ցանկացած գործունեություն, պետք է հետեւի եւ պահպանի էթիկական սկզբունքները: Այս մասին շաբաթ հայտարարել է Հռոմի պապ Ֆրանցիսկոսը՝ մենկնաբանելով բժշկության ոլորտում սենսացիոն գիտական փորձերի մասին վերջին տեղեկությունները, հայտնում է ANSA գործակալությունը:
«Անփոփոխ է մնում այն սկզբունքը, որ տեխնիկապես հնարավոր ամեն ինչ չէ, որ էթիկայի տեսակետից ընդունելի է: Գիտությունը եւ մարդկային ցանկացած գործունեություն պետք է սահմաններ ունենան եւ հարգեն էթիկական սկզբունքները՝ հանուն մարդկության բարօրության: Անհրաժեշտ է այս հարցերում պատասխանատվություն դրսեւորել»,- ասել է Հռոմի պապը:
Ֆրանցիսկոսը նշել է, որ եկեղեցու եւ գիտական աշխարհի միջեւ երկխոսության անհրաժեշտություն կա:
Վերջին մի քանի օրերին նա երկրորդ անգամ է անդրադառնում գիտության եւ բժշկության էթիկական սահմանների թեմային: Ավելի վաղ Ֆրանցիսկոսը կոչ էր արել չչարաշահել բժշկական տեխնոլոգիաները եւ դրանք համաչափ դարձնել մարդկային օրգանիզմի հնարավորություններին: Այս հայտարարությունները հնչել են բժշկական ձեռքբերումների մի քանի սենսացիոն հայտարարությունների ֆոնին: Այս շաբաթ ամերիկացի բժիշկները հայտարարել էին հիվանդի ԴՆԹ-ն փոխելու փորձի մասին հազվագյուտ հիվանդությունը բուժելու համար:
