Այսօր կնքված համագործակցության հուշագիրը ապացուցեց, որ Վանաձորի քաղաքապետի ընտրությունների ժամանակ Մամիկոն Ասլանյանին ձայն տված անձինք եղել են «Հայկական Վերածնունդ» կուսակցությունից: Այս մասին NEWS.am-ի հետ զրույցում ասաց ԱԺ Ելք խմբակցության պատգամավոր Էդմոն Մարուքյանը` անդրադառնալով Վանաձորի քաղաքապետ Մամիկոն Ասլանյանի եւ «Հայկական Վերածնունդ» կուսակցության կնքած համագործակցության հուշագրին:
«Զարմացած չենք բնականաբար եւ 1 տարվա մեր տարած պրոցեսներից մեկը նաեւ բացահայտումն էր, թե ովքեր հոկտեմբերի 10-ին վաճառեցին վանաձորցիների ապագան, եւ այդ բացահայտման գործընթացն իր հանգրվանին հասավ Սահմանադրական դատարանի որոշմամբ, որովհետեւ այդ որոշումից հետո այլեւս քողարկելու, թաքցնելու տարբերակ չկար»,-ասաց պատգամավորը:
Նա նշեց, որ իրենք համապատասխան հայտարարությամբ հանդես կգան եւ կտեղեկացնեն իրենց ապագա անելիքների մասին:
Ավելի վաղ NEWS.am-ը տեղեկացրել էր, որ «Հայկական վերածնունդ» կուսակցությունը համագործակցության հուշագիր է կնքել Վանաձորի քաղաքապետ Մամիկոն Ասլանյանի հետ:
NEWS.am-ի տեղեկություններով՝ ՀՎԿ-ն ստանալու է փոխքաղաքապետի պաշտոնը:
Նշենք, որ ՀՎԿ-ն ավելի վաղ հերքում էր, թե սեպարատ բանակցությունների մեջ կարող է մտնել Վանաձորի քաղաքապետի հետ՝ նշելով, իբր հավատարիմ են «Լուսավոր Հայաստանի» եւ ԲՀԿ-ի հետ կնքած հուշագրին: