Երեւանում, նոյեմբերի 19-ին, ավտովթար-վրաերթ է տեղի ունեցել. ժամը 01։50-ի սահմաններում 41-ամյա Արտեմ Ղ.-ն իր վարած Range Rover մակնիշի 90 VԼ 090 համարանիշի ավտոմեքենայով Կոմիտասի պողոտայի 44 հասցեի դիմաց բախվել է ճանապարհի թույլատրելի հատվածում կայանված «ՎԱԶ-21134» մակնիշի 11 GG 221 համարանիշի ավտոմեքենային։
Shamshyan,.com-ի փոխանցմամբ, «ՎԱԶ-21134»-ն էլ բախման հետեւանքով առաջ է ընթացել եւ վրաերթի ենթարկել 55-ամյա Նազե Ա.-ին, այնուհետեւ բախվել ճանապարհի թույլատրելի հատվածում կայանված Honda մակնիշի 35 AQ 168 համարանիշի ավտոմեքենային։
Վթար-վրաերթի հետեւանքով Նազե Ա.-ն մարմնական վնասվածքներով տեղափոխվել է թիվ 1 համալսարանական հիվանդանոց։ Վիրավորին առաջինը օգնության են հասել «ՎԱԶ-21134»-ի վարորդ 25-ամյա Է. Մարանդյանը եւ վթարի հարեւանությամբ ապրող մի քանի բնակիչներ, հիմնականում՝ երիտասարդներ։
Աղբյուրի տեղեկություններով՝ Արտեմ Ղ.-ն աշխատում է «Կարաս» ընկերությունում, իսկ վրաերթի ենթարկված Նազե Ա.-ն՝ «Սանիթեք» ընկերությունում։