ԱԻՄ առաջնորդ Պարույր Հայրիկյանը հանրաքվե անցկացնելու գործընթաց այսօր չի կարող իրականացնել: Այս մասին, այսօր՝ նոյեմբերի 20-ին, լրագրողների հետ զրույցում նշել է ԿԸՀ նախագահ Տիգրան Մուկուչյանը՝ անդրադառնալով ԱԻՄ նախագահի պահանջին եւ հայտարարած հացադուլին:
Նրա խոսքով, գործող Սահմանադրության 202-րդ հոդվածով սահմանվում է, որ հանրաքվե կարող են նախաձեռնել նաեւ քաղաքացիական նախաձեռնությամբ՝ 200 հազար քաղաքացիների կողմից, սակայն նույն սահմանադրության անցումային դրույթներում նշվում է, որ այդ դրությը ուժի մեջ է մտնում նորընտիր ՀՀ նախագահի կողմից՝ իր պաշտոնի ստանձնման օրը:
«Շատ հստակ նշվում է, որ նշված 15-րդ գլխի իրավադրույթները, որտեղ նաեւ ամրագրված է քաղաքացիական նախաձեռնության կարգով հանրաքվե անցկացնելու նախաձեռնության իրավունքի իրականացումը, ուժի մեջ է մտնում նորընտիր ՀՀ նախագահի կողմից՝ իր պաշտոնի ստանձնման օրը, իսկ մինչ այդ շարունակում են գործել 2005 թ-ի Սահմանադրության դրույթները»,-ասաց Տիգրան Մուկուչյանը՝ հավելելով, որ գործող դրույթներով սահմանադրական նորմերն են՝ Սահմանադրություն ընդունվում կամ դրանում փոփոխություն կատարվում են հանրաքվեի միջոցով` ՀՀ նախագահի կամ ԱԺ նախաձեռնությամբ. «Խնդիրը հետեւյալն է՝ համաձայն Սահմանադրության իրավանորմերի, որտեղ սահմանված է քաղաքացիների կողմից նախաձեռնություն անցկացնելու իրավունք, հստակ է նշված, թե այդ իրավանորմը որ ժամանակային պահից է սկսելու գործել»:
Ավելի վաղ NEWS.am-ը հայտնել էր, որ ԱԻՄ նախագահ Պարույր Հայրիկյանն այսօր՝ նոյեմբերի 20-ին, հացադուլ է սկսել ՀՀ Կենտրոնական ընտրական հանձնաժողովի շենքի մոտ` ընդվզելով հանձնաժողովի հակասահմանադրական գործողությունների դեմ:
ԱԻՄ նախագահը ցանկանում է կազմակերպել ստորագրահավաք՝ Սահմանադրական փոփոխություններ կազմակերպելու համար և այդ հարցով դիմել է ԿԸՀ: Վերջինս պատասխանել է, որ Հայաստանի «Հանրաքվեի մասին» օրենքը չի նախատեսում քաղաքացիական նախաձեռնություն: Առաջնորդվելով քաղաքացիական պատասխանատվությամբ՝ ԿԸՀ հակասահմանադրական գործողությունների դեմ, Հայրիկյանը հացադուլ է հայտարարել` պահանջելով կատարել Սահմանադրության պահանջը:
Նշենք, որ նա հացադուլն սկսել է նախօրեին երեկոյան՝ իր առանձնատանը, իսկ արդեն այսօր եկել է ԿԸՀ շենքի մոտ: