Զորամասից 1.5 մլն դրամի յուրացում կատարելու մեջ մեղադրվող՝ ՊՆ N զորամասի ավտոծառայության պետ Արթուր Շամիրյանը տուգանվել է 700 հազար դրամով:
Ըստ մեղադրանքի՝ Շամիրյանն այս տարվա մարտին եւ ապրիլին զորամասին հատկացված և իրեն վստահված ավտոբենզինից և դիզվառելիքից խոշոր չափերով հափշտակելու միասնական դիտավորությամբ յուրացրել է շուրջ 1.5 մլն դրամի բենզին եւ դիզվառելիք: Բացի դրանից, տեղեկագրերում ակնհայտ կեղծ տեղեկություններ է մտցրել:
Լոռու մարզի ընդհանուր իրավասության դատարանը ՊՆ պաշտոնյանին մեղավոր է ճանաչել եւ դատապարտել տուգանքի 700 հազար դրամի չափով՝ զրկելով նրան նյութական պատասխանատու պաշտոններ զբաղեցնելու իրավունքից 2 տարի ժամկետով: Գործով մեղադրող Հ. Մարգարյանի քաղաքացիական հայցն էլ դատարանը թողել է առանց քննության: