10 տարի առաջ մահացած հղիի ծնողները շարունակում են պնդել, որ իրենց դուստրը մահացել է «Շտապօգնության» բժշկի մեղքով:
Մարդու իրավունքների եվրոպական դատարանն օրերս որոշում է կայացրել՝ այս գործով տեղի է ունեցել Մարդու իրավունքների եվրոպական կոնվենցիայի 2-րդ հոդվածի խախտում (կյանքի իրավունք), քանի որ չի կատարվել հայցվորի դստեր մահվան հանգամանքների արդյունավետ հետաքննություն:
NEWS.am-ի հետ զրույցում այս գործով տուժողի իրավահաջորդի ներկայացուցիչ, 9 տարի առաջ ՄԻԵԴ բողոք ներկայացրած Մելսիկ Մանուկյանը պատմեց, որ բողոքում մասնավորապես նշվել է, որ հղի Կ.Մ.-ն մահացել է «Շտապօգնության» բժշկի կողմից մասնագիտական պարտականությունները ոչ պատշաճ կատարելու հետեւանքով:
«Բժիշկը սխալ ներարկում է արել, բացի դրանից, հիվանդանոց տեղափոխելիս նստել է վարորդի կողքին, ոչ թե հիվանդի, չնայած որ վերջինս վիճակը ծանր է եղել: Այն ժամանակ հարուցված քրեական գործը կարճվեց հանցակազմի բացակայության հիմքով, մենք տարբեր ատյաններում այդ որոշումը բողոքարկել ենք: Եվրոպական դատարան դիմելիս նկատի ենք ունեցել նաեւ իրավապահ մարմինների անգործությունը, թե ինչպես է, որ հանցակազմ չեն տեսել: Այժմ Եվրոպական դատարանն արձանագրել է, որ տեղի է ունեցել կյանքի իրավունքի խախտում եւ պարտավորեցրել 12 հազար եվրոյի փոխհատուցում է նշանակել»,- ասաց Մելսիկ Մանուկյանը:
Պաշտպանը հայտնեց, որ ՄԻԵԴ-ի որոշումը դեռ չեն ստացել՝ հասկանալու համար իրենց հետագա քայլերը: Նշենք, որ այս գործը ժամանակին քննվել է Երեւանի Ավան եւ Նոր Նորք վարչական շրջանների քննչական բաժնում: Գործով քննիչն ու դատախազը ներկայումս այլեւս իրենց պաշտոններին չեն: Կպատժվե՞ն իրավապահ մարմնի նախկին ներկայացուցիչները, ցույց կտա ժամանակը:
