Վանաձորի քաղաքապետի եւ «Հայկական վերածնունդ» կուսակցության միջեւ ստորագրված հռչակագրով կարող ենք արձանագրել ՀՎԿ-ի պաշտոնական վկայագրով քաղաքական մահը: Այս մասին այսօր՝ նոյեմբերի 20-ին, խորհրդարանում լրագրողների հետ ճեպազրույցում ասաց ԱԺ «Ելք» խմբակցության ղեկավար Նիկոլ Փաշինյանը:
«Ունենք հետեւյալ պատկերը. սխալ բուժում է տեղի ունեցել, հիվանդը մահացել է եւ դրանից հետո «Հայկական վերածնունդ» կուսակցությունը գալիս եւ ասում է՝ պատրաստ ենք մահացած հիվանդի հետ ամուսնանալ եւ փորձել վերակենդանացնել: Իհարկե, եթե Վանաձորի ավագանու ՀՀԿ խմբակցությունը քնած դշխուհին է, ՀՎԿ-ն կարող է իր համբույրներով վերակենդանացնել, բայց տվյալ դեպքում մահացած դշխուհու հետ գործ ունենք»,- ասաց Նիկոլ Փաշինյանը:
Խմբակցության ղեկավարը հիշեցրեց, որ Սահմանադրական դատարանը նոյեմբերի 10-ին կայացրած որոշմամբ չեղյալ է համարել Վանաձորի ավագանու բոլոր որոշումները, այսինքն, արձանագրել է՝ այն, ինչ տեղի է ունեցել, նիստեր չեն:
«Կառավարությունն այժմ իր գործառույթների մեջ պետք է մնա եւ ցույց տա՝ ինչքանով է հարգում Սահմանադրական դատարանի որոշումը»,- հավելեց Նիկոլ Փաշինյանը:
Ավելի վաղ NEWS.am-ը հայտնել էր, որ 2016թ. հոկտեմբերի 2-ին տեղի ունեցած Վանաձորի ավագանու ընտրություններում ընդդիմադիր երեք ուժերը՝ «Լուսավոր Հայաստան», ԲՀԿ եւ «Վայկական վերածնունդ», միասին ստացել էին 33 հոգանոց ավագանու մեծամասնությունը (18 ձայն), հետեւաբար, տրամաբանական պետք է լիներ, որ քաղաքապետ ընտրվեր այդ երեք ուժերի թեկնածուն՝ Քրիստ Մարուքյանը, սակայն փակ գաղտնի քվեարկության ժամանակ ՀՀԿ-ական Մամիկոն Ասլանյանը ստացավ ձայների մեծամասնությունը։ Ըստ էության, ընդդիմադիր ուժերից 4 հոգի խախտելով համաձայնությունը, գաղտնի քվեարկել էր Ասլանյանի օգտին։ Երեք ուժերը դրանից հետո որոշեցին բոյկոտել ավագանու նիստերը, որ մի կողմից քվորում չլինի, մյուս կողմից պարզեն, թե ովքեր են այդ 4 «դավաճանները»։
Սակայն Մամիկոն Ասլանյանը, վկայակոչելով ՏԻՄ մասին ընտրությունների 64-րդ հոդվածը, ավագանու 15 անդամներով նիստեր էր հրավիրում։
Սահմանադրական դատարանը 2017թ. նոյեմբերի 10-ին բավարարել է «Լուսավոր Հայաստան»-ի դիմումը՝ հակասահմադրական ճանաչելով ՏԻՄ օրենքի այն դրույթները, որոնց հիման վրա Վանաձորի ավագանին շուրջ մեկ տարի առանց քվորումի նիստեր էր հրավիրել: «Լուսավոր Հայաստան» կուսակցությունը դիմել էր Կառավարությանը՝ Վանաձորում նոր ընտրություններ նշանակելու համար: Այդ ընթացքում, սակայն, «Հայկական վերածնունդ» կուսակցությունը համագործակցության հուշագիր կնքեց Վանաձորի քաղաքապետ Մամիկոն Ասլանյանի հետ՝ փոխարենը ստանալով փոխքաղաքապետի պաշտոնը։
