Կոտայքի մարզում, նոյեմբերի 19-ին, արտակարգ դեպք է տեղի ունեցել. ժամը 17:40-ի սահմաններում Եղվարդ քաղաքի Նաիրի բժշկական կենտրոնից Ոստիկանության Նաիրիի բաժին ահազանգ է ստացվել, որ անգիտակից վիճակում շտապօգնության հերթապահ խումբը «Արմենիա» բժշկական կենտրոն է տեղափոխել մի քաղաքացու:
Shamshyan.com-ի փոխանցմամբ, ոստիկանները պարզել են, որ քաղաքացին Կոտայքի մարզի գյուղերից մեկի բնակիչ, 34-ամյա Գրիշա Մ.-ն է: նույն օրը Գրիշա Մ.-ն տանը կենցաղային հարցերի շուրջ վիճաբանություն է ունեցել տան անդամների հետ, այնուհետեւ դուրս է եկել տնից եւ գնացել Արագյուղ գյուղի վարչական տարածքում գտնվող «Չայի ափ» կոչվող ձորակ եւ պարանով ծառից կախվելու միջոցով փորձել է ինքնասպան լինել:
Բարեբախտաբար, երբ նա տանից դուրս է եկել, նրա հետեւից գնացել է հորեղբոր որդին, 27-ամյա Շահեն Մ.-ն, ով կարողացել է իր կրակայրիչով պարանը կտրել եւ ցած իջեցնել Գրիշա Մ.-ին:
Հիվանդանոցում բժիշկները ոստիկաներին, իսկ այնուհետեւ ժամանած հետաքննիչին հայտնել են, որ նա ի վիճակի չէ կատարվածի մասին բացատրություններ տալ: Աղբյուրի տեղեկություններով՝ Գրիշա Մ.-ին փրկած Շահեն Մ.-ն աշխատում է «Տիգրանակերտ» կրթահամալիրում՝ որպես ուսուցիչ:
