Հուշագիրը ստորագրվել է 2 քաղաքական ուժերի միջեւ: Նոյեմբերի 20-ին ԱԺ-ում ավանդական ճեպազրույցների ժամանակ այս մասին ասաց Հանրապետական խմբակցության ղեկավար Վահրամ Բաղդասարյանը՝ պատասխանելով լրագրողների այն հարցին, որ շաբաթ օրը հուշագրի ստորագրումից հետո Վանաձորի փոխքաղաքապետ է դարձել «Հայկական վերածնունդ» կուսակցության անդամ Արկադի Փելեշյանը:
Բաղդասարյանի հավաստիացմամբ՝ Հայաստանի Հանրապետական կուսակցությունը չի միջամտում «Հայկական վերածննդի» ներքին գործերին, եւ նրանք իրենք պետք է որոշեն, թե ում են պատրաստվում նշանակել այս կամ այն պաշտոնին: «Նոր քաղաքական իրադարձություններ են ծավալվել: Քաղաքական ուժերը համաձայնության են եկել, որ պետք է համագործակցեն, իսկ մնացածը ապագան ցույց կտա»,- հավելեց Վահրամ Բաղդասարյանը:
Ավելի վաղ NEWS.am-ը հայտնել էր, որ «Հայկական վերածնունդ» կուսակցության Վանաձորի կառույցը ՀՀԿ-ի հետ համաձայնագիր է ստորագրել, որի շնորհիվ երկրի երրորդ քաղաքի ավագանիում քաղաքապետը մեծամասնություն կստանա: Նախկինում «Հայկական վերածնունդը» մերժում էր Վանաձորի քաղաքապետի հետ բանակցություններ վարելու հնարավորությունը՝ հայտարարելով, որ հավատարիմ է «Լուսավոր Հայաստանի» եւ «Բարգավաճ Հայաստանի» հետ ստորագրած հուշագրին: