Եթե Հայաստանում ընդդիմությունն իր առջեւ խնդիր է դրել կաթվածահար անել Վանաձորի ավագանիի գործունեությունը, ապա դա քաղաքի եւ նրա բնակիչների հգամար ոչ մի լավ բան չի հանգեցնի: Նոյեմբերի 20-ին ԱԺ-ում ավանդական ճեպազրույցների ժամանակ այս մասին ասաց Հանրապետական խմբակցության ղեկավար Վահրամ Բաղդասարյանը:
Ի պատասխան հարցին՝ ՀՀԿ-ն ի՞նչ է խոստացել «Հայկական վերածննդին» հուշագիրը ստորագրելու դիմաց, Բաղդասարյանը նշեց, որ նրանք որեւէ մեկի ծառայության կարիքը չունեն: «Այն, ինչ կա, հուշագրում ամրագրվել է: Ոչ մեկի ճակատին գրված չէ, որ նրանք պետք է հավերժորեն կա՛մ ընդդիմությունում լինեն, կա՛մ իշխանությունում»,- հավելեց Բաղդասարյանը:
Ավելի վաղ NEWS.am-ը հայտնել էր, որ «Հայկական վերածնունդ» կուսակցության Վանաձորի կառույցը ՀՀԿ-ի հետ համաձայնագիր է ստորագրել, որի շնորհիվ երկրի երրորդ քաղաքի ավագանիում քաղաքապետը մեծամասնություն կստանա: Նախկինում «Հայկական վերածնունդը» մերժում էր Վանաձորի քաղաքապետի հետ բանակցություններ վարելու հնարավորությունը՝ հայտարարելով, որ հավատարիմ է «Լուսավոր Հայաստանի» եւ «Բարգավաճ Հայաստանի» հետ ստորագրած հուշագրին:
