Եվրահանձնաժողովը չի համարում, որ Գերմանիայում կառավարական կոալիցիայի ստեղծման շուրջ նախնական խորհրդատվության ձախողումը Եվրոպայի համար վտանգ է ներկայացնում:
«Մենք վստահ ենք, որ Գերմանիայում սահմանադրական գործընթացները հիմք են ապահովում կայունության ու հաջորդականության համար»,- հայտարարել է Եվրահանձնաժողովի նախագահի պաշտոնական ներկայացուցիչ Մարգարիտիս Սխինասը, փոխանցում է DW-ն:
Նա ընդգծել է, որ հենց այդ հատկություններն են «գերմանական քաղաքականության տարբերվող նշան» հանդիսանում, եւ Բրյուսելը հույս ունի, որ այդպես կլինի նաեւ այսուհետ՝ չնայած ներկայիս քաղաքական ճգնաժամին: Սխինասը հրաժարվել է մեկնաբանել ԵՄ բարեփոխումներ իրականացնելու ծրագրերի վրա Բեռլինի քաղաքական իրավիճակի հնարավոր ազդեցության հարցը:
Ընդ որում՝ ԵՄ բարձրաստիճան ներկայացուցիչը չի բացառել դեկտեմբերին ծրագրված եվրագոտու պետությունների ու կառավարությունների ղեկավարների գագաթնաժողովի տեղափոխումը:
«Կտեսնենք, թե արդյոք գերմանացիները տեղափոխման մասին հարցում կանե՞ն»,- հայտնել է նա AFP-ի հետ հարցազրույցում:
Ֆրանսիայի նախագահ Էմանուել Մակրոնը նշել է, որ ԵՄ-ն շահագրգռված չէ Բեռլինում քաղաքական ճգնաժամի խորացմամբ: «Մենք Գերմանիային եւ Եվրոպային ցանկանում ենք, որ մեր կարեւորագույն գործընկերը կայուն եւ ուժեղ լինի»,- dpa-ն մեջբերել է Ելիսեյան պալատի ներկայացուցչի խոսքը: AFP-ն նշում է, որ Գերմանիայում ճգնաժամը հարվածել է Մակրոնի ծրագրերին ԵՄ-ում լայնամասշտաբ բարեփոխում անցկացնելու վերաբերյալ:
Մեծ Բրիտանիայի վարչապետ Թերեզա Մեյն իր հերթին չի ակնկալում, որ Բեռլինում խոհրդակցությունների ձախողումը հետեւանքներ կունենա Եվրամիությունից Միացյալ թագավորության դուրս գալու բանակցությունների վրա: Կառավարական կոալիցիայի ստեղծումը Գերմանիայի եւ գերմանացի քաղաքական գործիչների ներքին գործն է, հայտարարել է Մեյի ներկայացուցիչը:
Նիդերլանդների ԱԳ նախարար Հալբե Զեյլսթրան Բեռլինում անարդյունք խորհրդակցությունների ավարտը «Եվրոպայի համար վատ նորություն է որակել»: Եթե Գերմանիան, որը «ԵՄ շատ ազդեցիկ երկիրն է», երկար ժամանակ մնա առանց կառավարության, «դժվար կլինի ԵՄ-ում խիստ որոշումներ ընդունել», նշել է նա:
Նոյեմբերի 20-ի գիշերը Գերմանիայում նոր կառավարական կոլիցիայի ստեղծման ավելի քան 4 շաբաթ տեւած նախնական խորհրդակցություններն ընդհատվել են: Ազատ դեմոկրատական կուսակցության առաջնորդ Քրիսթիան Լինդները հայտնել է բանակցություններից դուրս գալու մասին, որոնց մասնակցում էին նաեւ Քրիստոնեա-դեմոկրատական միություն, Քրիստոնեա-սոցիալական միություն եւ «Միություն 90»/«Կանաչներ» կուսակցությունները, խորհդակցությունների խափանումը բացատրելով գործընկերների միջեւ անհաղթահարելի տարաձայնություններով:
