Ադրբեջանական կողմը բազմիցս հրաժարվել է ձեռք բերված պայմանավորվածությունների կատարումից: Նոյեմբերի 21-ին Երեւանում ՌԴ ԱԳ նախարար Սերգեյ Լավրովի հետ համատեղ մամուլի ասուլիսի ժամանակ այս մասին ասաց ՀՀ ԱԳ նախարար Էդվարդ Նալբանդյանը:
Պատասխանելով հարցին՝ այնամենայնիվ, ո՞րն է բանակցություններում առաջընթացի բացակայության խնդիրը, եթե թե՛ Երեւանը, թե՛ Բաքուն հայտարարում են առաջընթացի ձգտման մասին, Նալբանդյանը նշեց, որ խնդիրն այն է, որ գործը խոսքից չտարբերվի: Այս կապակցությամբ նա մի քանի փաստ հիշեցրեց: Այսպես՝ Կազանի հայտնի հանդիպումից առաջ ԱԳ նախարարները 3-4 հանդիպում էին անցկացրել, հիմնական սկզբունքների վերաբերյալ փաստաթղթի տեքստը համաձայնեցված էր: Հանդիպումից 10 օր առաջ ստացվեց տեքստը եւ ռուս նախարարի կից նամակն այն մասին, որ տեքստում փոփոխություններ չեն կատարվելու: Սակայն ադրբեջանական կողմը հանդիպմանը ներկայացավ 10, նույնիսկ 12 փոփոխություններով: Եվ սա առաջին դեպքը չէ: Մինչեւ Կազանը նման բան է եղել Սոչիում, Աստրախանում, Սանկտ Պետերբուրգոմ: «Չեմ խորանա պատմության մեջ: Որպեզի չանդրադառնամ բոլոր հանդիպումներին եւ գագաթնաժողովներին, հիշեցնեմ՝ Վիեննայում եւ Սանկտ Պետերբուրգում ինչ-որ բանի մասին էինք պայմանավորվել: Ադրբեջանը դարձյալ հետքայլ արեց: Վիեննայի հանդիպումից հետո Բավում հայտարարեցին, որ իրենք ոչ մի բան չեն պայմանավորվել, եւ որ միջնորդները, իսկ նրանք նախարարներն էին, ճիշտ չեն հասկացել եւ հայտարարություն կատարել»,- նշեց Նալբանդյանը՝ հիշեցնելով, որ Վիեննայի եւ Սանկտ Պետերբուրգի պայմանավորվածությունները վերաբերում էին միջադեպերի հետաքննության մեխանիզմների ստեղծմանը եւ Կասպրշիկի խմբի հնարավորությունների ընդլայնմանը: Նախարարը նշեց, որ դրանից հետո ԵԱՀԿ-ում նախագահող երկիրը քանիցս կապվել է ադրբեջանական կողմի հետ բավականին բարձր մակարդակով, եւ նրանք ասում էին՝ խնդիր չկա, մենք կհամաձայնվենք Կասպրշիկի թիմի ընդլայնմանը: Եվ 4 անգամ արգելափակել են, հիշեցրեց Նալբանդյանը:
Ինչ վերաբերում է կարգավորման հիմքի երեք սկզբունքներին, ապա դրանք, նշեց նախարարը, հայտնի սկզբունքներ են, այդ թվում կա նաեւ Ադրբեջանի ստորագրությունը Աթենքի ԵԱՀԿ ԱԳՆԽ հայտարարության տակ: Սակայն Բաքուն այժմ բոլոր կեղծ ու ճշմարիտ միջոցներով հրաժարվում է:
«Պայմանավորվել ենք կրակի դադարեցման մասին. կա 1994-95 թվականների երեք համաձայնություն եւ ի՞նչ: Ադրբեջանը կեղծ ու ճշմարիտ բոլոր միջոցներով փորձում է հեռանալ պայմանավորվածություններից: Իհարկե, լավ կլիներ, որ խոսքերը գործերին համապատասխանեին»,- նշեց նախարարը: Նրա խոսքով՝ բառացիորեն Ժնեւում խոսվում էր լարվածության թուլացման հավելյալ միջոցների մասին. դրանք միջոցներ են, որոնց մասին խոսվել է Վիեննայում եւ Սանկտ Պետերբուրգում: Եվ դա կրկին արվում է: Ընդ որում՝ ադրբեջանցիները փորձում են չմտաբերել հայտնի 5 հայտարարությունները:
«Հուսանք, որ Ադրբեջանը կփոխի դիրքորոշումը եւ իր ցանկությունն իսկապես գործի կվերածի: Հայաստանը երբեք չի հեռացել ձեռք բերված պայմանավորվածություններից եւ մտադիր է ԵԱՀԿ ՄԽ համանախագահների հետ համատեղ շարունակել բացառապես խաղաղ կարգավորմանն ուղղված ջանքերը»,- հայտարարեց Նալբանդյանը:
Ի պատասխան բանակցություններում ճեղքման հնարավորության եւ նախագահների հանդիպման մասին հարցին՝ Նախարարը նշեց, որ տեղեկություններ չունի մոտ ժամանակում հանդիպման հավանականության վերաբերյալ: «Խոսքը ճեղքման մասին չէ: Վերջերս ես ասացի, որ դժվար է հեծանիվ հորինել: Հիմնական սկզբունքները եւ տարրերը սեղանի վրա են: Կան չմշակված հարցեր: Մենք շատ երկար ենք բանակցություններ վարել»,- հիշեցրեց նախարարը: Դրա հետ մեկտեղ, նա ընդգծեց, որ խաղաղ բանակցություններն այլընտրանք չունեն: