ՀՀ ԱԳ նախարար Էդվարդ Նալբանդյանը հերքեց Բաքվի այն հայտարարությունները, որ բանակցությունների օրակարգում է ՄԱԿ ԱԽ բանաձեւերի կատարումը:
Նոյեմբերի 21-ին Երեւանում կայացած ՌԴ ԱԳ նախարար Սերգեյ Լավրովի հետ համատեղ մամուլի ասուլիսում Նալբանդյանը պատասխանելով հարցին՝ իրականությանն արդյոք սա համապատասխանո՞ւմ է, հշեցրեց, որ նշված բանաձեւերի ընդունման հիմնական նպատակը ռազմական գործողությունների դադարեցումն էր:
«Բանաձեւերը, իսկ դրանք չորսն են, այն պատճառով են ընդունվել, որ Ադրբեջանը հրաժարվում էր նախորդների կատարումից: Ռազմական գործողությունները դադարեցվել են եռակողմ համաձայնագրի ընդունման շնորհիվ: Ինչ վերաբերում է այն հայտարարություններին, որ բանաձեւերն օրակարգում են, իմ հիշողությամբ՝ վերջին 10 տարում դրանք ընդհանրապես չեն քննարկվել»,- ընդգծեց Նալբանդյանը՝ հավելելով, թե ինչ վերաբերում է կարգավորման տարրերին, դրանք ներկայացված են հիմնական փաստաթղթերում եւ արտացոլված են 5 հայտնի հայտարարություններում: