Կանայք ավելի քիչ են հակված ավտոմեքենա վարելու ընթացքում շեղվել կողմնակի բաների վրա, քան տղամարդիկ, պարզել են Օսլոյի Տրանսպորտային էկոնոմիկայի ինստիտուտի աշխատակիցները, որոնք ուսումնասիրել են ավելի քան 1,5 հազար վարորդների սովորությունները: Նրանց աշխատանքների արդյունքները հրապարակվել են Frontiers in Psychology ամսագրում:
Ուսումնասիրության ընթացքում հետազոտվել են երկու խումբ՝ 1,1 հազար ուսանող եւ 617 մեծահասակ վարորդ: Նրանց մեծ մասը մինչ այդ զանազան շեղող գործոնները խնդիր չի համարել:
Պարզվել է, որ շեղվելու հակումը կախված է սեռից եւ տարիքից, ինչպես նաեւ անհատի տեսակից: Այսպես, մեծամասամբ այն դրսեւորվում է երիտասարդ տղամարդ վարորդների մոտ, ինչպես նաեւ նյարդային մարդկանց, էքստրավերտների ու, ընդհանուր առմամբ, մեքենա հաճախ վարողների մոտ: Մեծահասակ կին վարորդները, նաեւ նրանք, որոնք կարողանում են իրենց վերահսկել, ավելի քիչ են շեղվում:
Փորձագետները դիտարկել են զանազան շեղող գործոններ, ինչպիսիք են ռադիոկայանի փոփոխումը, հեռախոսով զրույցը կամ ուղեւորների հետ շփումները: Համաձայն նախորդ տարվա որոշ ուսումնասիրությունների՝ ճանապարհային բոլոր պատահարների 12 տոկոսի պատճառն այն է, որ վարորդը շեղվում է ինչ-որ բանով:
Հետազոտողները նշել են «հատուկ միջոցներ» ձեռնարկելու անհրաժեշտությունը, որպեսզի ապագայում ռիսկի խմբի վարորդները ավելի քիչ շեղվեն: Նրանց հաջողվել է պարզել, որ վարորդին շեղող գործոնների մասին պարզ տեղեկատվություն տալը կարող է նվազեցնել շեղվելու հավանականությունը:
ԱՀԿ 2016-ի տվյալների համաձայն՝ ամեն տարի ճանապարհային պատահարի է ենթարկվում շուրջ 50 միլիոն մարդ, ավելի քան միլիոնը մահանում է: