ՌԴ հերոս, տիեզերագնաց օդաչու Սերգեյ Ռյազանսկին Facbook-ի իր էջում հրապարակել է Հայաստանից Սեւանի հերթական եզակի լուսանկարները, որոնք կատարել է տիեզերքից:
«Սեւանա լիճը Հայաստանում եւ Կովկասյան տարածաշրջանում ամենամեծ լիճն է, Եվրասիայի ամենախոշոր քաղցրահամ բարձրլեռնային լճերից մեկը: Լիճը գտնվում է Գեղարքունիքի մարզում՝ ծովի մակարդակից 1900 մետր բարձրությամբ»,- գրել է Ռյազանսկին:
Նախկինում նա հրապարակել էր տիեզերքից կատարված Երեւանի եզակի լուսանկարները:
«Երեւանը մյուս մայրաքաղաքներին նման չէ. այստեղ մարդիկ ոչ մի տեղ չեն շտապում, քաղաքը շարժվում է իր չափավոր տեմպով: Իսկ Կասկադը Երեւանի խորհրդանիշներից մեկն է, որը հայտնի է նրա սահմաններից դուրս»,- Facebook-ի իր էջում գրել է տիեզերագնացը:
Իսկ ամեն ինչ սկսվել է Արարատի նրա հրապարակած լուսանկարներից:
«Արարատը Հայկական բարձրավանդակի ամենաբարձր հրաբխային զանգվածն է: Կազմված է իրար ձուլված 2 հանգած հրաբուխների կոների հիմքերից՝ Մեծ Արարատից եւ Փոքր Արարատից: Իսկ նրանց միջեւ հեռավորությունը 11 կմ է կազմում»,- գրել է Ռյազանսկին:
Նշենք, որ Ռյազանսկին 2017-ի հուլիսի 28-ից Բայկոնուր տիեզերակայանից մեկնարկած «Սոյուզ ՄՍ-05» տիեզերանավում է որպես անձնակազմի հրամանատար, նաեւ ՄՏԿ-53/53 տիեզերական հիմնական արշավախմբի ծրագրի Միջազգային տիեզերակայանի անձնակազմի հրամանատար:
