Առաջին կարգի հաշմանդամություն ունեցող «Կոշ» ՔԿՀ-ի դատապարտյալ Հարություն Պողոսյանն այսօրվանից հացադուլ է սկսել: NEWS.am-ի հետ զրույցում «Հելսինկյան ասոցիացիա»-ի դիտորդ Արման Վեզիրյանը, նշեց, որ Հարություն Պողոսյանը հացադուլը է սկսել այն բանի համար, որ Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Արմեն Բեկթաշյանը առանց իր ներկայության նիստ է անցկացրել: Նա դիմել էր դատարան, քանի որ վաղաժամկետ ազատ արձակման հանձնաժողովը մերժել էր իր դիմումը:
«Նա ներկա չի եղել նիստին, ոչ էլ ներկայացուցիչ ունի: Առաջին դատական նիստը նշանակված է եղել հոկտեմբերի 16-ին, բայց «Դատապարտյալների հիվանդանոց» ՔԿՀ-ում գտնվող Հարություն Պողոսյանին հոկտեմբերի 6-ին տեղափոխել են «Կոշ» ՔԿՀ եւ նոյեմբերի 13-ին արել նիստը: Մինչեւ հիմա էլ նրան չի տրամադրվել դատարանի որոշումը»,-ասաց նա:
Այդ ընթացքում նա դիմել է դատարան, որ ընդհատության կարգով գործն ուղարկվի այլ դատարան, սակայն չի քննարկվել դիմումը:
Հարություն Պողոսյանին մեղադրանք է առաջադրվել ՀՀ ՔՕ 266-րդ հոդվածի հատկանիշներով՝ Թմրամիջոցների կամ հոգեներգործուն նյութերի ապօրինի շրջանառությունը դրանք իրացնելու նպատակով: