ԱՄՆ եւ Ռուսաստանի նախագահներ Դոնալդ Թրամփը եւ Վլադիմիր Պուտինը հեռախոսազրույցի ժամանակ քննարկել են Սիրիայի ներկայիս խնդիրները՝ հաշվի առնելով Սիրիայում ահաբեկիչների ոչնչացմանն ուղղված ավարտվող ռազմական գործողությունը:
Պուտինը շեշտել է այս երկրում երկարաժամկետ քաղաքական կարգավորման ակտիվացման պատրաստակամությունը` ՄԱԿ Անվտանգության խորհրդի 2254 բանաձեւի հիման վրա:
Կողմերը նշել են Սիրիայի ինքնիշխանությունը, անկախությունը եւ տարածքային ամբողջականությունը պահպանելու անհրաժեշտությունը` քաղաքական կարգավորմանը հասնելու այն սկզբունքներով, որոնք պետք է մշակվեն առավելագույնս ընդլայնված ներսիրիական բանակցային գործընթացի ընթացքում:
Պուտինը Թրամփի հետ զրույցում պատմել է Բաշար Ասադի հետ ունեցած հանդիպման հիմնական արդյունքների մասին:
Ավելի լայն կոնտեքստում Պուտինը կրկին արտահայտվել է հակաահաբեկչական ուղղությամբ Միացյալ Նահանգների հետ համատեղ աշխատանքի բարելավման օգտին` նշելով երկու երկրների հատուկ ծառայությունների միջեւ ջանքերի համակարգման գործնական նշանակությունը: Այս տեսակետը ողջունել է ԱՄՆ նախագահը:
Ղեկավարներն անդրադարձել են Աֆղանստանի իրավիճակին, որը մտահոգություն է առաջացնում ահաբեկչության եւ թմրամիջոցների սպառնալիքների աճի հետեւանքով:
Քննարկվել է նաեւ իրանական միջուկային ծրագրի շուրջ ստեղծված իրավիճակը: Միեւնույն ժամանակ, նշվել է Ռուսաստանի հանձնառությունը Գործողությունների համատեղ համապարփակ ծրագրի լիարժեք իրականացմանը:
Կողմերը գոհունակություն են հայտնվել զրույցի կապակցությամբ, որը գործնական եւ բովանդակալից բնույթ է կրել: