Թբիլիսիում ինտենսիվ հրաձգությունն ու պայթյունները չեն դադարում հատուկ գործողության գոտում, որը գիշերվանից անցկացնում է Վրաստանի Պետանվտանգության ծառայության հակաահաբեկչական դեպարտամենտը, հայտնում է «Sputnik-Грузия»-ն:
Պայթյունների հետեւանքով 2 բնակարան է այրվել, դրանցից մեկից ծուխ է դուրս գալիս, կրակ է երեւում: Նախնական տեղեկություններով՝ կասկածյալները բնակարաններից մեկի պատուհանից ձեռքի նռնակներ են նետել: Տեղեկություն է հայտնվել տուժողի մասին, բայց այն պաշտոնապես չի հաստատվել:
Իրադարձությունները տեղի են ունենում Գաբրիել Սալոսկու փողոցի բազմաբնակարան շենքերից մեկում: Տարածված տեղեկությունների համաձայն՝ 2 կասկածյալ կա:
Տեղի բնակիչները հայտնել են, որ անվտանգության նկատառումներից ելնելով՝ իրենց թույլ չեն տալիս բնակարններից դուրս գալ:
Տարհանել են շենքի երրորդ մուտքի բնակիչներին: Առաջին եւ երկրորդ մուտքերի բնակիչներն իրենց բնակարաններում են, հեռախոսով Rustavi2 հեռուստաալիքին հայտնել է շենքի բնակիչներից մեկը: Նրա խոսքով՝ հատուկ գործողությունն ավելի ակտիվ փուլ է մտել առավոտյան ժամը 5-ից:
Բնակիչները վախենում են, որ շենքերը չեն դիմանա պայթյուններին, քանի որ արդեն հին են:
«Новости-Грузия» գործակալության տեղեկություններով՝ Թբիլիսիի Իսանի շրջանում Գաբրիել Սալոսկու փողոցում գիշերը ավարտվել է օտարերկրյա 2 քաղաքացիների ձերբակալության հատուկ գործողությունը: Արտասահմանցիները մեղադրվում են ահաբեկչական կազմակերպությունների հետ կապերի մեջ: Գործողության ժամանակ կասկածյալները կրակ են բացել պետանվտանգության աշխատակիցների վրա:
