Նոյեմբերի 22-ի ժամը 10:30-ի դրությամբ Հայաստանի տարածքում բոլոր ավտոճանապարհներն անցանելի են: Այս մասին տեղեկացնում է Հայաստանի ԱԻՆ մամուլի ծառայությունը:
Այսօր Հայաստանը գտնվելու է հզոր ցիկլոնի ազդեցության գոտում։ Հանրապետության ամբողջ տարածքում սպասվում են տեղումներ. Շիրակում, Գեղարքունիքում, Արագածոտնի, Կոտայքի, Լոռու, Տավուշի, Վայոց Ձորի եւ Սյունիքի լեռնային բոլոր բնակավայերում` ձյան տեսքով։ Նշված հատվածներում սպասվում է նաեւ բուք, ցածր հորիզոնական տեսանելիություն, ճանապարհներին` մերկասառույց։
Արագածոտնի մարզի Ապարան, Գեղարքունիքի մարզի Ճամբարակ, Լոռու մարզի Վանաձոր, Սպիտակ, Կոտայքի մարզի Հրազդան, Չարենցավան, Տավուշի մարզի Դիլիջան, Վայոց ձորի մարզի Ջերմուկ քաղաքներում եւ Սարավան-Զանգեր ավտոճանապարհին առկա են տեղումներ ձյան տեսքով: Ելնելով սպասվող անբարենպաստ եղանակային պայմաններից` ԱԻՆ-ը վարորդներին հորդորում էք նշված մարզեր երթեւեկել բացառապես ձմեռային անվադողերով։
Վրաստանի ենթակառուցվածքների նախարարության ճանապարհային դեպարտամենտից էլ Հայաստանի տրանսպորտի, կապի եւ տեղեկատվական տեխնոլոգիաների նախարարությանը տեղեկացրել են, որ նոյեմբերի 22-ին ժամը 10:00-ի դրությամբ Ստեփանծմինդա-Լարս ավտոճանապարհը բաց է միայն թեթեւ մարդատար ավտոմեքենաների համար: Ձյան պատճառով ավտոճանապարհը ծանրաքաշ մեքենաների համար փակ է:
