Վանաձորի բժշկական կենտրոնում անցած տարվա հոկտեմբերին մահացած ծննդկան Հռիփսիմե Նազլուխանյանի գործով մեղադրյալ, ավագ մանկաբարձ-գինեկոլոգ Դավիթ Շահվերդյանը շարունակում է աշխատել Վանաձորի բժշկական կենտրոնում:
NEWS.am-ի հետ զրույցում հիվանդանոցից հայտնեցին, որ երբ ստանան գրություն բժշկի գործունեությունը դադարեցնելու վերաբերյալ, այդ ժամանակ էլ համապատասխան ընթացք կտրվի:
Նշենք, որ Դավիթ Շահվերդյանը հիվանդանոցի ծննդաբերական բաժանմունքի ժամանակավոր պաշտոնակատարն էր, բայց նոյեմբերի 22-ից բաժնի վարիչը վերադարձել է աշխատանքի: Հիշեցնենք, որ վարույթն իրականացնող մարմինը որոշել է դադարեցնել Շահվերդյանի գործունեությունը եւ որոշման պատճենն ուղարկել է դատախազություն, որտեղ էլ վերջնական որոշումը կկայացվի: Ի դեպ, վերջին տարիներին սա առաջին դեպքն է, երբ քննչական մարմինը որոշում է դադարեցնել մեղադրյալ բժշկի գործունեությունը, նախկինում, մեղադրվող բժիշկներն ամբողջ նախաքննության եւ դատաքննության ընթացքում աշխատել են, միայն մեղադրական դատական ակտից հետո է կասեցվել նրանց գործունեությունը:
Ավելի վաղ հայտնել էինք, որ ծննդկան Հռիփսիմե Նազլուխանյանը մահացել է 2016 թվականի հոկտեմբերի 18-ին Վանաձորի ԲԿ-ում: Հարուցված քրեական գործի շրջանակում նշանակված հանձնաժողովային դատաբժշկական փորձաքննության եզրակացության համաձայն՝ 32-ամյա կնոջ ծննդաբերությունից հետո մանկաբարձ-գինեկոլոգների կողմից չեն կատարվել ծննդկանի հետծննդաբերական արյունահոսության հիմնական աղբյուր հանդիսացող վնասվածքի՝ արգանդի պատռվածքի վերականգնում եւ արյունահոսության դադարեցում։ Ըստ փորձագետների՝ ծննդկանի նկատմամբ չեն կատարվել բժշկական անհրաժեշտ միջոցառումները, ինչի արդյունքում ծննդկանի մոտ արյունահոսական բարդությունները շարունակվել են ու հանգեցրել մահվան:
Գործով մեղադրանք է առաջադրվել Վանաձորի ԲԿ-ի ավագ մանկաբարձ-գինեկոլոգ Դավիթ Շահվերդյանին եւ մանկաբարձ-գինեկոլոգ Ա. Բալայանին: Վերջինս այս տարվա հոկետեմբերին ավտովթարի հետեւանքով մահացել է:
