Լավրովի այցը տարածաշրջան ուներ խաղաղասիրական նպատակներ։ Այս մասին այսօր՝ նոյեմբերի 22-ին, լրագրողների հետ հանդիպմանը հայտարարեց Հայաստանի Դեմոկրատական կուսակցության նախագահ Արամ Գասպարի Սարգսյանը։
«Այն պարագայում, երբ Ադրբեջանը Երեւանից մոտ 60 կմ այն կողմ՝ Նախիջեւանում զինավարժություններ են անցկացնում, սա լուրջ մեսիջ է, իսկ Ռուսաստանը Սիրիայում ծավալվող իրադարձությունների ֆոնին ուզում է, որ մեր տարածաշրջանում խաղաղություն պահպանվի»,-նշեց նա։
Արամ Սարգսյանի կարծիքով, Ռուսաստանի համար Հայաստանը կարեւոր դաշնակից է, որքան էլ այլեւայլ շահարկումներ ծավալվեն։ «Բացահայտ է, որ Հայաստանի սահմանին հզոր զորավարժությունները նպատակ ունեն ցույց տալ, որ ամեն պահի պատրաստ են հարձակվել, ինչը լուրջ լարվածություն կբերի։ Եթե մենք այսօր աղմուկ չբարձրացնենք, սա Ադրբեջանի կողմից կարող է սադրանքի պարարտ հող ստեղծել Զանգեզուրը վերցնելու հին ծրագրերի իրականացման համար»,-ընդգծեց նա։
Հիշեցնենք, որ ՌԴ արտաքին գործերի նախարար Սերգեյ Լավրովը նոյեմբերի 20-ին պաշտոնական այցով մեկնել էր Բաքու, իսկ նոյեմբերի 21-ին եկել Երեւան։
