Ֆրանսիայի «Ազգային ճակատ» կուսակցության առաջնորդ Մարին Լը Պենը չորեքշաբթի HSBC բանկից իրազեկում է ստացել իր անձնական հաշիվը փակելու մասին, ըստ որում՝ նրա խոսքով, դա արվել է առանց ծանրակշիռ հիմնավորման: Քաղաքական գործիչն այս մասին հայտնել է Փարիզի արվարձանային Նանտերում տեղի ունեցած մամուլի ասուլիսի ժամանակ, որտեղ գտնվում է կուսակցության կենտրոնակայանը, փոխանցում է ՏԱՍՍ-ը:
Նրա խոսքով՝ հաշիվը փակելու մասին իրեն հեռախոսով անձամբ հայտնել է HSBC-ի ֆրանսիական մասնաճյուղի ղեկավար Թոմ Վանդեւիլը, որը, ինչպես հիշեցրել է Լը Պենը, մի քանի տարի առաջ ձեռք էր բերել ֆրանսիական Hervet բանկը, որտեղ ինքը երկար տարիներ անձնական հաշվեհամար է ունեցել: «Առանց որեւէ հիմնավորման ինձ այսօր առավոտյան հայտարարեցին իմ անձնական հաշիվը փակելու մասին»,- ասել է քաղաքական գործիչը:
Լը Պենը նշել է, որ իր հետ զրույցում HSBC-ի ֆրանսիական մասնաճյուղի ղեկավարն իր հաշվի փակման մասին հայտնել է դրա տիրոջ մասին բավարար անձնական տեղեկություն չունենալու պատճառով: «Պարոն Վանդեւիլն ինձ ասաց, որ ստիպված է իմ հաշիվը փակել, քանի որ իմ մասին բավարար տեղեկություններ չունի: Ես նշեցի, որ անցած 25 տարիներից հետո ինձ, այնուամենայնիվ, թվում էր, որ նրանք լավ իմաստով արդեն բավականաչափ տեղեկություններ ունեին, եւ ի հավելումն՝ ես հանրային անձ եմ, նախագահի թեկնածու եմ եղել, իմ ամբողջ կարողությունը հրապարակվել է համընդհանուր հասանելի պետական կայքում»,- ընդգծել է նա:
Նախօրեին ֆրանսիական խոշորագույն Societe Generale բանկը «Ազգային ճակատից» պաշտոնապես պահանջել է փակել բոլոր հաշիվները, որ ունի կուսակցությունն այդ հաստատությունում: Ֆրանսիական լրատվամիջոցների տվյալներով՝ համապատասխան նամակն «Ազգային ճակատին» ուղղված է եղել այս տարվա հուլիսին եւ այն պարունակում է ոչ միայն այդ ծայրահեղ աջ կուսակցության ղեկավար կառույցի, այլ նաեւ նրա բոլոր տարածքային բաժանմունքների հաշիվները փակելու պահանջ:
Լը Պենը հայտարարել է, որ «Ազգային ճակատի» հաշիվների եւ իր անձնական հաշվի փակման փաստի առթիվ Societe Generale-ի եւ HSBC-ի դեմ համապատասխանաբար դատական հայցեր կներկայացվեն:
