Թբիլիսիի Գաբրիել Սալոսկու պողոտայում հատուկ գործողություն է իրականացվում ազգությամբ չեչեն երեք անձանց դեմ, որոնք, ենթադրաբար, «Իսլամական պետություն» ահաբեկչական կազմակերպության գրոհայիններ են եւ Թբիլիսիում ապօրինի են գտնվում, գրում է «Կվիրիս պալիտրա» պարբերականը:
Ավելի վաղ տեղի բնակիչներից մեկը լրագրողներին պատմել էր, որ տանը երեխայի հետ ապրել է չեչեն ընտանիք՝ Վրաստանի Պանկիսի կիրճից:
Դեպքի վայր են ուղեւորվել Վրաստանի Պետական անվտանգության ծառայության հակաահաբեկչական դեպարտամենտի եւ ոստիկանության մեծ թվով աշխատակիցներ, ինչպես նաեւ զրահատեխնիկա:
Հատուկ գործողությունն անցկացվում է գիշերվանից, պարբերաբար կրկնվում են կրակոցներն ու պայթյունները: Կասկածյալները գտնվում են Գաբրիել Սալոսկու պողոտայի թիվ 156 հասցեի 9-րդ շենքի երրորդ մուտքում: Այդ մուտքում պայթյունի հետեւանքով այրվել է երկու բնակարան:
Այդ ընթացքում ձերբակալվել է մեղադրյալներից մեկը: Ներկայումս շարունակվում է մյուսներին ձերբակալման գործողությունը:
Ենթադրաբար, նրանք օտարերկրացի են եւ ահաբեկչական կազմակերպության անդամ, ավելի վաղ հայտարարել են ՊԱԾ-ում:
Բացի այդ, հայտնի է, որ կա մեկ վիրավոր: Վիրավորվել է ՊԱԾ հատուկ գործողությունների դեպարտամենտի աշխատակիցը, որը ծանր վիճակում տեղափոխվել է հիվանդանոց: Այնտեղ նրան վիրահատել են: Այժմ տուժածը գտնվում է վերակենդանացման բաժանմունքում:
Հատուկ ջոկատայինը վիրավորվել է, երբ ահաբեկչության մեջ մեղադրվողները կրակ են բացել: Նրանք նռնակներ են նետել եւ կրակել ավտոմատներից:
Տեղի բնակչության անվտանգությունն ապահովելու համար իրականացվել է բնակչության տարհանում այն շենքի մուտքերից, որտեղ անմիջականորեն տեղի է ունենում հատուկ գործողությունը, ինչպես նաեւ հարակից տարածքներից, փոխանցում է «Սպուտնիկ Գրուզիան»:
