Արցախի Հանրապետության պետական նախարար Արայիկ Հարությունյանը, նոյեմբերի 21-ին, Հայ Առաքելական եկեղեցու Արցախի թեմի առաջնորդ Պարգեւ արքեպիսկոպոս Մարտիրոսյանի եւ ԱՄՆ-ում ԱՀ մշտական ներկայացուցիչ Ռոբերտ Ավետիսյանի հետ միասին, մի շարք հանդիպումներ է ունեցել ԱՄՆ-ում՝ Կալիֆորնիայի խորհրդարանականների եւ հայկական համայնքի ներկայացուցիչների հետ:
Այցելելով Հայ Առաքելական եկեղեցու Մեծի Տանն Կիլիկիո Հյուսիսային Ամերիկայի Արեւմտյան թեմի ազգային առաջնորդարան՝ պատվիրակությունը հանդիպել է թեմի առաջնորդ Մուշեղ արքեպիսկոպոս Մարտիրոսյանին եւ թեմի խորհրդի անդամներին: Կողմերը քննարկել են նոյեմբերի 23-ին կայանալիք՝ «Հայաստան» համահայկական հիմնադրամի ամենամյա հեռուստամարաթոնի, ինչպես նաեւ՝ Արցախի զարգացման ծրագրերի հետ կապված մի շարք հարցեր: Ա. Հարությունյանը բարձր է գնահատել թեմի մասնակցությունն ազգային նշանակության նախաձեռնություններում՝ վստահություն հայտնելով, որ Արցախի հանդեպ ուշադրությունը շարունակական բնույթ է կրելու ապագայում եւս:
Պատվիրակությունն այնուհետեւ հանդիպել է Կալիֆորնիայի նահանգային ասամբլեայի անդամներ Ադրին Նազարյանին եւ Լաուրա Ֆրիդմանին, ինչպես նաեւ՝ Լոս Անջելեսի արտակարգ իրավիճակների կառավարման վարչության ղեկավար Արամ Սահակյանին: Ա. Հարությունյանը կարեւորել է Կալիֆորնիայի կողմից Արցախի Հանրապետության ճանաչման ակտը եւ կողմերի միջեւ գործնական կապերի ամրապնդումը՝ շեշտադրելով ասամբլեայի անդամների եւ հայկական համայնքի նշանակությունն այդ գործում: Հաշվի առնելով Կալիֆորնիայի օրենսդիրների Արցախ վերջին այցի ժամանակ ձեռքբերված պայմանավորվածությունները՝ պետնախարարը նրանց հետ քննարկել է դրանց իրականացմանն առնչվող մի շարք հարցեր: Կողմերը երկուստեք պատրաստակամություն են հայտնել խորացնելու ձեւավորված փոխգործակցությունը եւ քայլեր ձեռնարկելու փոխադարձ հետաքրքրության ոլորտներում համատեղ ծրագրերի իրագործման ուղղությամբ:
Արցախի պատվիրակությունը մասնակցել է Լոս Անջելեսում ՀՀ գլխավոր հյուպատոսությունում տեղի ունեցած ընդունելությանը, որտեղ ներկա էին նաեւ Կալիֆորնիայի նահանգային եւ ՏԻՄպաշտոնյաներ, հայկական համայնքի եւ հոգեւոր դասի ղեկավարներ: Ա. Հարությունյանն իր խոսքում ներկայացրել է Արցախի ընթացիկ ռազմաքաղաքական եւ սոցիալ-տնտեսական իրավիճակը՝ ընդգծելով, որ, Հայաստանի Հանրապետության եւ Սփյուռքի շարունակական աջակցության շնորհիվ, տարիների ընթացքում նշանակալի ձեռքբերումներ են գրանցվել հանրապետության անվտանգության ու զարգացման ճակատներում: Ա. Հարությունյանը բարձր է գնահատել «Հայաստան» համահայկական հիմնադրամի դերակատարումը համազգային ներուժի համակարգման եւ արդյունավետ իրացման հարցում՝ հորդորելով ներկաներին գործուն աջակցություն ցուցաբերել նաեւ այս տարվա հեռուստամարաթոնին:
Միջոցառման ընթացքում պետնախարարը «Երախտագիտություն» մեդալ է փոխանցել համայնքի ակտիվ անդամ Միքայել Մինասյանի ընտանիքին, ով պարգեւատրվել է հետմահու՝ Արցախի զարգացմանն ուղղված նախաձեռնություններում ունեցած ակտիվ մասնակցության համար: