ԵՄ-ի հետ շրջանակային համաձայնագիրը կստորագրվի, բայց Հայաստանը պետք է աշխատի բրյուսելյան գագաթաժողովում ընդունվելիք հռչակագրում խուսափել անցանկալի ձեւակերպումներից։ Այս մասին այսօր՝ նոյեմբերի 22-ին «Հայաստան-ԵՄ շրջանակային համաձայնագրի ստորագրման նախաշեմին. արձագանքներ Քիշնեւից եւ Թբիլիսիից» թեմայով քննարկման ժամանակ հայտարարեց քաղաքագետ Գլոբալիզացիայի եւ տարածաշրջանային համագործակցության վերլուծական կենտրոնի նախագահ, քաղաքագետ Ստեփան Գրիգորյանը։
Նրա կարծիքով՝ եթե նույնիսկ լինեն անցանկալի ձեւակերպումներ, Հայաստանը չպետք է հրաժարվի համաձայնագիրը ստորագրելուց, այլ նման ձեւակերպումների դեպքում վերապահում անի։
«Համաձայնագրում նշվում է Ղարաբաղի հարցում խաղաղ կարգավորման, ընդգծվում է ԵԱՀԿ Մինսկի խմբի համանախագահների դերը։ Ընդհանուր համաձայնագիրը այն է, ինչ Հայաստանի համար ընդունելի է, ուստի չի կարող հռչակագիրը շատ տարբերվել համաձայնագրից, իսկ լինելու դեպքում Հայաստանը պետք է վերապահում անի, ոչ թե հրաժարվի այն ստորագրելուց»,-նշեց նա։
Հիշեցնենք, որ նոյեմբերի 24-ին Բրյուսելում կկայանա Եվրոպական միության Արեւելյան գործընկերություն ծրագրի 5-րդ գագաթաժողովը, որի ժամանակ նախատեսվում է ստորագրել Հայաստամի եւ ԵՄ-ի միջեւ շրջանակային համաձայնագիրը։