Եթե 140 մարդ, որոնց վրա տարածվում էր ուսման հիմքով զինծառայությունից տարկետումը, չեն լուծում հայկական բանակի համալրման եւ թվակազմի ապահովման խնդիրը, ապա գիտական միջավայրում վիթխարի խնդիր են լուծում: Այս մասին նոյեմբորի 22-ին ԱԺ-ում ընթացող կլոր սեղանի ժամանակ հայտարարեց «Հանուն գիտության զարգացման» նախաձեռնության համակարգող Դավիթ Պետրոսյանը՝ մեկնաբանելով վերջերս ընդունված «Զինծառայության եւ զինծառայողի կարգավիճակի մասին» օրենքը, որով ուսման հիմքով տարկետումը չեղյալ է համարվում:
Նրա խոսքով՝ ասպիրանտներն ապահովում են գիտական միջավայրի վերարտադրողականությունը եւ այսպիսով կարեւորագույն խնդիր են լուծում: «Եվ եթե այս 140 մարդը բանակ չգնա, դրանից, ըստ էության, ոչինչ չի փոխվի: Սակայն գիտական միջավայրից այս 140 մարդու հեռանալու դեպքում Հայաստանում գիտությունը կարող է պարզապես անհետանալ»,- ընդգծեց Պետրոսյանը:
