Երեկ երեկոյան Արցախի զորամասերի մեկի պահպանության տեղամասում ականի այթյունի հետեւանքով 3 զինծառայող է զոհվել, եւս մեկը վիրավոր է: Զոհվել են լեյտենանտ Գեղամ Զաքարյանը եւ շարքայիններ Սարգիս Աբրահամյանն ու Սարգիս Մելիքյանը:
22-ամյա սպա Գեղամ Զաքարյանը Մուսալեռ գյուղից էր: Այս տարվա ամռանն ավարտել էր Վազգեն Սարգսյանի անվան ռազմական ինստիտուտն ու հուլիսի վերջին տեղափոխվել Արցախ՝ ծառայության: 20-ամյա Սարգիս Մելիքյանն էլ Գեղարքունիքի Վարդենիս քաղաքից էր, հունվարին պետք է ավարտեր ծառայությունը: Սարգիսը տան միակ որդին էր, 3 քույր ունի: Զոհված մյուս զինծառայողը՝ Սարգիս Աբրահամյանը, Արարատի մարզի Մասիս քաղաքից էր, բանակ էր զորակոչվել 1.5 տարի առաջ:
Ականի պայթյունից վիրավորում ստացած Նարեկ Հովեյանը Ստեփանակերտի հոսպիտալում է: Նրա վիճակը ծայրահեղ ծանր է գնահատվում: Բժիշկներն ամեն ինչ անում են՝ 19-ամյա զինծառայողի վիճակը կայունացնելու համար. վիրավորին Երեւան տեղափոխելու մասին նրանք առայժմ չեն մտածում: Քննչական կոմիտեի տեղեկացմամբ՝ զինծառայողները զոհվել են մարտական դիրքում ինժեներական աշխատանքներ կատարելիս: Քրեական գործ է հարուցվել: Դեպքի մանրամասները պարզելու համար քննություն է տարվում:
Թբիլիսիում կեսգիշերից հակաահաբեկչական գործողություն էր իրականացվում: Վրացի հատուկ ջոկատայինները շրջապատել էին Վրաստանի մայրաքաղաքի Իսանի շրջանի շենքերից մեկը: Պետանվտանգության ծառայության տվյալներով՝ շենքում օտարերկրյա երկու քաղաքացիներ են թաքնվել, որոնց կասկածում են ահաբեկչական կազմակերպությունների հետ կապերի մեջ: Վրացի ուժայինները ձերբակալել են նրանցից մեկին: Որոշ տվյալներով՝ կասկածյալները չեչեններ են: Տեղացիներից մեկը նշել է, որ շենքում Պանկիսի կիրճից եկած չեչեն ընտանիք էր ապրում՝ երեխայի հետ:
Տեղական լրատվամիջոցները հաղորդում են հրաձգության եւ պայթյունների մասին: Պայթյունի հետեւանքով հրդեհ է բռնկվել, 2 բնակարան այրվել է: Ըստ տեղեկությունների՝ կասկածյալները շենքի բնակարաններից մեկի պատուհանից ձեռքի նռնակներ են նետել եւ կրակ բացել պետանվտանգության աշխատակիցների ուղղությամբ: Բնակիչների մի մասին տարհանել են, մյուսներին, անվտանգության նկատառումներից ելնելով, թույլ չեն տվել փողոց դուրս գալ:
Հաղորդվում է մի քանի վիրավորի մասին: Ականատեսները պատմում են, որ նրանց հատուկ գործողության գոտուց դուրս են բերել շտապ օգնության երեք մեքենաներով: Վիրավորվել է նաեւ մեկ հատուկ ջոկատային, որն ավելի ուշ հիվանդանոցում մահացել է: Հատուկ գործողություն իրականացնողներին զրահատեխնիկա է միացել: Հերթական գրոհից հետո հակաահաբեկչական գործողությունն ավարտվել է:
Բազմաթիվ ուսանողներ անհամբերությամբ սպասում էին նոյեմբերի 22-ին. Ազգային ժողովում տարկետման վերացման դեմ բողոքող ուսանողների հետ հանդիպում էր նշանակված: Չնայած անձրեւոտ եղանակին՝ առավոտից մի խումբ ուսանողներ հավաքվել էին՝ ուղիղ հեռարձակմամբ հետեւելու կլոր սեղանին: Քննարկմանը մասնակցել են նաեւ կրթության նախարարն ու պաշտպանության փոխնախարարը: Լեւոն Մկրտչյանը վստահեցրել է, որ պատրաստ են լսել ուսանողների բոլոր փաստարկները, բայց նաեւ հիշեցրել է նախարարության թվերը. դոկտորական եւ թեկնածուական թեզ պաշտպանած երիտասարդների շատ փոքր թիվն է մնում գիտության մեջ՝ ընդամենը 15%-ը:
Քննարկումների արդյունքում ուսանողներն ու իշխանությունները համաձայնության են եկել: Ուսանողներին երկու շաբաթ ժամանակ են տվել, որպեսզի իրենց առաջարկները ձեւակերպեն եւ գրավոր ներկայանեն: Այդ առաջարկները քննարկվելու է աշխատանքային խմբում, որը, ամենայն հավանականությամբ, կստեղծվի պաշտպանության նախարարությունում:
Մինչ այդ, ուսանողները քննարկելու են, արժե՞ զուգահեռաբար շարունակել բողոքի ակցիաները: Ամեն դեպքում, Դավիթ Պետրոսյանը վստահեցնում է, որ տարկետման իրավունքի հետ կապված համաձայնություն արդեն կա, մնում է միայն հստակեցնել դրանից օգտվելու չափանիշները: Նշենք, որ տարկետման իրավունքի սահմանափակում նախատեսող օրինագիծը խորհրդարանն արդեն ընդունել է: Եթե պատասխանատու մարմիններն ընդունեն ուսանողների առաջարկները, դրանք կներառվեն օրենքի հետ կապված կառավարության որոշումներում: Ամեն դեպքում, օրենքում հեղափոխական փոփոխությունները քիչ հավանական են համարում:
Առողջապահական ոլորտում իրարանցում է. մի քանի օր է՝ քննարկվում է Հայաստանում 13 տարեկան աղջիկներին մարդու պապիլոմավիրուսի դեմ պատվաստման հարցը: Շատերը, այդ թվում՝ ոլորտի մասնագետներ, դեմ են դրան: Ընդ որում, դեմ են ոչ թե պատվաստմանը, այլ գարդասիլ պատվաստանյութին: Գարդասիլի հակառակորդները վկայակոչում են Բիլ Գեյթսի խոսքերը եւ նշում, որ այդ պատվաստանյութը ստեղծվել է բնակչության թիվը կրճատելու համար: Պատվաստման կողմնակիցներն էլ ընդդիմախոսներին մեղադրում են անտեղյակության եւ «դավադրությունների տեսությանը» հավատալու մեջ: Պատվաստանյութի դեմ հանդես եկող բազմաթիվ բժիշկների հիմնական փաստարկը հետեւյալն է. գարդասիլը վտանգավոր է, իսկ դրա արդյունավետությունն ապացուցված չէ:
Կրքերն այնքան են թեժացել, որ գարդասիլի հակառակորդները նույնիսկ պահանջել են Լեւոն Ալթունյանի հրաժարականը: Նշենք, որ առողջապահության նախարարությունը նախատեսում է պատվաստման ծրագիրը ներդնել այս տարվա դեկտեմբերից: Որոշումն արդեն արժանացել է կառավարության հավանությանը:
Երեկ գիշերվանից Լոռու մարզի մի շարք համայնքներում, այդ թվում՝ Վանաձորում ձյուն է տեղում: Առավոտյան արդեն Վանաձորում ձյան շերտը 10-20 սմ-ի է հասել: Չնայած նախապես տեղեկացվել էր հնարավոր տեղումների մասին, ձյունը, ինչպես միշտ, անակնկալի է բերել վարորդներին: Պարզվում է՝ նրանց մեծ մասը շարունակում է երթեւեկել ամառային անվադողերով: Առատ ձյուն է տեղացել հանրապետության մի շարք այլ մարզերում եւս:
Խառնաշփոթ իրավիճակ է եղել նաեւ Երեւանի փողոցներում: Մայրաքաղաքի տարբեր հատվածներում վթարներ են գրանցվել, խցանումներ են առաջացել: Ձմռան մոտենալուն զուգահեռ նորից խնդիրներ են առաջանում բեռնափոխադրումների հարցում: Վրաստանի ենթակառուցվածքների նախարարության ճանապարհային դեպարտամենտը տեղեկացրել է, որ Ստեփանծմինդա-Լարս ավտոճանապարհը բաց է միայն թեթեւ մարդատար ավտոմեքենաների համար: Ձյան պատճառով ճանապարհը ծանրաքաշ մեքենաների համար փակվել է:
Նոյեմբերի 22-ին դոլարն ու եվրոն սկսել են թանկանալ: Դոլարի փոխարժեքն այսօր կազմել է 483 դրամ, եվրոյինը՝ 568, ռուբլունը՝ 8 դրամ 21 լումա, ֆունտինը՝ 640 դրամ:
Նոյեմբերի 23-ի գիշերը հանրապետության շրջանների զգալի մասում տեղումներ են սպասվում, այդ թվում՝ ձյան տեսքով: Օդի ջերմաստիճանն աստիճանաբար 12-15 աստիճանով կնվազի: Երեւանում նույնպես տեղումներ են սպասվում: Մայրաքաղաքում գիշերը կդիտվի 0+2, ցերեկը՝ +4+6 աստիճան տաքություն: