Հատուկ գործողության արդյունքում Թբիլիսիում ձերբակալվել է հանցավոր խմբի մեկ անդամ, երեքը սպանվել են: Այս մասին ասուլիսի ժամանակ հայտարարել է Պետական անվտանգության ծառայության մամուլի ծառայության ղեկավար Նինո Գիորգոբիանին, տեղեկացնում է «Վրաստանի առաջին ալիքը»:
Նրա խոսքով՝ հանցավոր խմբի անդամները Վրաստանի քաղաքացիներ չեն: «Ըստ առկա տեղեկատվության հանցավոր խմբի անդամները Վրաստանի քաղաքացիներ չեն: Վերջիններիս նկատմամբ դիտարկումները վերջին մի քանի շաբաթվա ընթացքում են կատարվել: Միջազգային ահաբեկչության դեմ պայքարի շրջանակներում, այս խմբի բոլոր անդամներին հայտնաբերելու համար, ձեռնարկվում են համապատասխան միջոցներ», - ասել է նա, հաղորդում է Interpressnews-ը:
Թբիլիսիի Գաբրիել Սալոսկու փողոցում տեղի ունեցած հատուկ գործողության ժամանակ տեղացիներից ոչ մեկը չի տուժել, հաղորդում է «Նովոստի-Վրաստանը»։
Հակաահաբեկչական գործողությունը սկսվել է նոյեմբերի 21-ի երեկոյան եւ տեւել ավելի քան 20 ժամ: Այս ամբողջ ընթացքում անընդհատ հրաձգություն է կատարվել, պայթյուններ են տեղի ունեցել: Հատուկ գործողության ընթացքում զոհվել է Պետական անվտանգության ծառայության մեկ անդամ, վիրավորվել՝ 4-ը:
Թբիլիսիի բնակիչներին վտանգ չի սպառնում, նրանք կարող են ազատ տեղաշարժվել: Այդ մասին հայտարարել է Վրաստանի վարչապետ Գեորգի Կվիրիկաշվիլին` մեկնաբանելով հակաահաբեկչական գործողությունների ավարտը:
«Ես ուզում եմ ասել, որ քաղաքում կարող եք անվտանգ տեղաշարժվել եւ անվտանգության առումով վախենալու պատճառ չկա: Մեր հերոսական տղաները չեզոքացրեցին վտանգը, որը կարող էր շատ վատ ավարտ ունենալ», - ասել է Կվիրիկաշվիլին: