Կառավարությունն առաջարկում է Հայաստանի տարածքում ստեղծել տվյալների հավաքման եւ մշակման կենտրոն՝ հագեցած ոլորտի միջազգային տեխնիկական ստանդարտներին համապատասխան սարքավորումներով։ Համապատասխան որոշումը նոյեմբերի 23-ին ընդունվել է կառավարության նիստում։
Որոշման նախագիծը ներկայացնելով՝ տրանսպորտի, կապի եւ ՏՏ նախարար Վահան Մարտիրոսյանը նշեց, որ դրա ստեղծումը թույլ կտա տվյալների պաշտպանության եւ պահպանման նորագույն միջոցներ կիրառելիս ձեւակերպել միասնական ստանդարտներ եւ չափանիշներ։ Ընդ որում, կենտրոնի ստեղծումը պլանավորվում է իրականացնել պետական-մասնավոր սեկտորներ գործընկերության հիմքով, ինչը զգալի տնտեսական շահ կբերի։ «Նոր կառույցի ստեղծման բոլոր ծախսերն իր վրա կվերցնի մասնավոր ընկերությունը։ Իսկ պետությունն իր հերթին կապահովի ենթակառուցվածքների հարցը եւ շենք կտրամադրի»,- պարզաբանեց նախարարը։
Ի պատասխան վարչապետ Կարեն Կարապետյանի հարցին, թե երբ է պլանավորվում ավարտին հասցնել կենտրոնի շինարարությունը, եւ ֆինանսավորման ինչ ծավալներ են դրա համար անհրաժեշտ, եւ կան արդյոք պոտենցիալ ներդրողներ, նախարարն ասաց․ «Համապատասխան ընկերությունների ընտրության աշխատանքները ավարտին կմոտենան եկող տարվա օգոստոսին։ Նախնական հաշվարկով՝ կենտրոնի ստեղծումը կարժենա 10 մլն դոլար»։
