Դիզվառելիքի ներմուծմամբ եւ իրացմամբ զբաղվող տնտեսվարող սուբյեկտներին հնարավորություն կընձեռվի վերաբաշխել նախկինում վճարած ակցիզային հարկի գումարները: Համապատասխան որոշումն ընդունվեց կառավարության նոյեմբերի 23-ի նիստում:
Որոշման նախագիծը ներկայացնելիս ֆինանսների նախարար Վարդան Արամյանը նշեց, որ մինչեւ ընթացիկ տարվա վերջը գործում է ռեժիմ, որի համաձայն՝ դիզվառելիքը համարվում է ենթաակցիզային ապրանք, որի չափը սահմանված է 35 հազար դրամ: Միաժամանակ դիզվառելիքի ԱԱՀ հարկում ներկայումս չի կատարվում: «Բանն այն է, որ 2018 թվականի հունվարի 1-ից դիզվառելիքի իրացումն արդեն մտնում է ԱԱՀ հարկման դաշտ, իսկ ակցիզային հարկը նվազեցվում է 13 հազար դրամով: Սակայն դրա հետ մեկտեղ հարց է ծագում՝ իսկ ի՞նչ են անելու այն տնտեսվարողները, ովքեր արդեն դիզվառելիքը ձեռք են բերել եւ պահեստավորել՝ նախկինում վճարելով 35 հազար դրամ: Ստացվում է, որ նրանց համար հարկերը բարձրանում են, քանի որ այս ձեռնարկատերերը հայտնվում են ինչպես ԱԱՀ հարկման դաշտում, այնպես էլ ակցիզային հարկման: Այս պատճառով մենք տնտեսվարողներին հնարավորություն ենք տալիս պահեստավորված վառելիքի ծավալների հստակեցման դեպքում ակցիզային հարկից վերահաշվարկ կատարել ԱԱՀ-ին՝ 35 հազար դրամից համապատասխանաբար հանելով 13 հազար դրամը»,- պարզաբանեց Արամյանը: