Կառավարությունը նոյեմբերի 23-ին կայացած նիստի ժամանակ հավանություն տվեց «Բաժնետիրական ընկերությունների մասին» օրենքում փոփոխությունների նախագծին։ Տնտեսական զարգացման եւ ներդրումների նախարար Սուրեն Կարայանը նշեց, որ անհրաժեշտ է բարելավել ՀԲ Doing Business զեկույցում Հայաստանի ցուցանիշները փոքր ներդրողների, բաժնետերերի մասով։ Բացի այդ, նպատակ կա նաեւ բարձրացնել բաժնետիրական ընկերություններում կառավարման թափանցիկության աստիճանը։
Օրինագծի համաձայն՝ առաջարկվում է 3 փոփոխություն։ Դրանցից առաջինը վերաբերում է նրան, որ ընկերությանը միացած անձը մինչեւ գործարք կնքելը պետք է բացահայտի միանալու հետ կապված հանգամանքները։
Երկրորդ նորամուծությունը նախատեսում է բաժնետերերի գրանցամատյանում ընդգրկել Տնօրենների խորհրդի իրավունքների եւ պարտականությունների մասին տեղեկություններ, եթե նրանք համատեղության սկզբունքով այլ ընկերություններում պաշտոններ են զբաղեցնում։ Այսօրվա դրությամբ այդ կարգավորումը չի նախատեսում անձի ֆունկցիոնալ պարտականությունների կոնկրետացում։
Եվ վերջապես, երրորդ փոփոխությունը նախատեսում է արգելել ԲԲԸ-ում համատեղել Խորհրդի նախագահի, տնօրենի եւ գլխավոր տնօրենի պաշտոնները։