Առաջին կարգի հաշմանդամություն ունեցող «Կոշ» ՔԿՀ-ի դատապարտյալ Հարություն Պողոսյանն արդեն երեք օր շարունակում է հացադուլը: Այս մասին NEWS.am-ի հետ զրույցում ասաց «Հելսինկյան ասոցիացիա»-ի դիտորդ Արման Վեզիրյանը: Հարություն Պողոսյանը հացադուլ է սկսել այն բանի համար, որ Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Արմեն Բեկթաշյանը առանց իր ներկայության նիստ է անցկացրել: Նա դիմել էր դատարան, քանի որ վաղաժամկետ ազատ արձակման հանձնաժողովը մերժել էր իր դիմումը:
Այդ ընթացքում նա դիմել է դատարան, որ ընդհատության կարգով գործն ուղարկվի այլ դատարան, սակայն չի քննարկվել դիմումը:
Հարություն Պողոսյանին մեղադրանք է առաջադրվել ՀՀ ՔՕ 266-րդ հոդվածի հատկանիշներով՝ Թմրամիջոցների կամ հոգեներգործուն նյութերի ապօրինի շրջանառությունը դրանք իրացնելու նպատակով: Նրա պատժի կրման ժամկետը կլրանա 2018թ. մարտին: