Հանցագործներն ավելի շուտ ծրագրել էին ինչ-որ հակաիրավական գործողություններ իրականացնել ոչ թե ուրիշ պետության, այլ Վրաստանի տարածքում: Այս մասին NEWS.am-ի հետ զրույցում ասաց Վրաստանի իշխող «Վրացական երազանք» կոալիցիայի պատգամավոր, քաղաքագետ Մամուկա Արեշիձեն՝ մեկնաբանելով Թբիլիսիում վերջերս տեղի ունեցած իրադարձությունները:
Նրա խոսքով՝ Վրաստանում օրերս պետք է միջազգային համաժողով անցկացվի «Նոր մետաքսի ճանապարհի» թեմայով, որին մասնակցելու են նաեւ արտասահմանյան հյուրեր, որը եւ կարող էր դառնալ հանցավոր խմբի թիրախը: «Համաժողովին տարբեր երկրների մեծ թվով ներկայացուցիչներ են մասնակցելու, այդ թվում՝ նաեւ մի քանի վարչապետներ»,- նշեց Արեշիձեն՝ հավելելով, որ սա ընդամենը վարկած է:
Խոսելով վրացի ուժայինների հանցավոր խմբավորման չեզոքացման բուն հատուկ գործողության մասին՝ պատգամավորը հավաստիացրեց, որ այն անցկացվել է արտասահմանյան հատուկ ծառայությունների մասնակցությամբ եւ աջակցությամբ:
Հիշեցնենք, որ Թբիլիսիում հակաահաբեկչական գործողությունը սկսվել էր նոյեմբերի 21-ի երեկոյան եւ տեւել ավելի քան 20 ժամ: Այս ամբողջ ընթացքում անընդհատ հրաձգություն է կատարվել, պայթյուններ են տեղի ունեցել: Հատուկ գործողության ընթացքում զոհվել է Պետական անվտանգության ծառայության մեկ անդամ, վիրավորվել՝ 4-ը: Թբիլիսիում ձերբակալվել է հանցավոր խմբի մեկ անդամ, երեքը սպանվել են: Ձերբակալվածը Վրաստանի քաղաքացի Ռիզվան Գորնակաշվիլին է, որը կալանավորվել էր դեռեւս հատուկ գործողությունը սկսելուց առաջ։ Նա հիմա ցուցմունք է տալիս։