Զիմբաբվեի նախկին նախագահ Ռոբերտ Մուգաբեն իր հրաժարականին հանգեցրած գործարքի շրջանակներում իր երկրում դատական հետապնդումներից անձեռնմխելիություն եւ պաշտպանության երաշխավորություն է ստացել: Այս մասին հաղորդում է Reuters- ը՝ վկայակոչելով բանակցություններին մոտ կանգնած աղբյուրներին:
Աղբյուրի համաձայն՝ 93-ամյա Մուգաբեն ցանկություն է հայտնել մահանալ հայրենիքում եւ չի ցանկանում վտարված ապրել: «Իր համար շատ կարեւոր էր, որ երկրում գտնվելու ժամանակ երաշխավորված լինի իր անվտանգությունը ... թեեւ դա չի խոչընդոտի իրեն ցանկության կամ անհրաժեշտության դեպքում արտերկիր մեկնել»:
Միեւնույն ժամանակ, նա նշել է, որ Մուգաբեն գիտակցում է իր կնոջ նկատմամաբ հասարակության թշնամական վերաբերմունքը:
«Այս առումով անհրաժեշտ էր նաեւ հավաստիացնել նրան, որ իր ողջ ընտանիքը, այդ թվում կինը ապահով կլինեն»:
Մուգաբեն կստանա կենսաթոշակային փաթեթ, որը կներառի կենսաթոշակային, բնակության, արձակուրդային եւ տրանսպորտային նպաստ, բժշկական ապահովագրություն, սահմանափակ օդային ճանապարհորդության եւ անվտանգության համար վճար: