Մարոկոյի թագավոր Մուհամեդ VI անձրեւի համընդհանուր աղոթքի մասին հրաման է տվել: Ուրբաթ՝ նոյեմբերի 24-ին, երկրի բոլոր մզկիթներում, հավատացյալները պետք է անձրեւի համար աղոթեն, ինչը երաշտից տառապող երկրի համար ինչպես երբեք արդիական է, հաղորդում է AFP- ն:
Ամռան վերջից Մարոկոյում անձրեւի սուր պակաս է զգացվում:
Երաշտն այս շրջանում հարվածել է հացահատիկի արտադրությանը եւ 35 միլիոն բնակչությամբ երկրին կարող է ստիպել հացահատիկ ներմուծել:
Եղանակը դարձել է Մարոկոյում խոսակցության հիմնական թեման: Երկրի բնակչության 40 տոկոսը կախված է գյուղատնտեսությունից, որը կազմում է ՀՆԱ-ի ավելի քան 15 տոկոսը:
«Դեռ շատ վաղ է խոսել երաշտի մասին, բայց եթե դեկտեմբերի կեսերին տեղումներ չլինեն, ապա իրավիճակը ծայրահեղ կլինի», - ասել է գյուղատնտեսության նախարարության աղբյուրը:
